養傷期召髮型師登門
張柏芝染啡髮驅厄運

一直以來，張柏芝也希望將頭髮染啡，但礙於電影和廣告形象而遲遲未能成事。柏芝今次腰傷要在家中休養，便趁機電召髮型師到其家中將頭髮染啡。而據風水師蘇民峰表示，染髮和戴帽也可以改變運程。

張柏芝本月四日為《慈善星輝仁濟夜》飛車籌款，導致胸椎骨受傷入院，至上周日，柏芝已出院返回其母又一村寓所休養。柏芝近日因為樓下單位裝修影響休息，於是其父鬍鬚勇每天接載柏芝到自己馬鞍山寓所休息。

一償多年心願
昨日下午一時半左右，鬍鬚勇駕駛其平治房車，與兒子張柏文到又一村接載柏芝離開。當柏芝在菲傭攙扶下離開寓所時，記者發現她本來一頭黑髮，竟然變成啡色。
原來，柏芝趁在家休養期間無所事事，找來其Headquarters專用髮型師CarrCheng，到其家中為她染髮。

愈後再換髮型
昨日記者致電Carr時，他說：「柏芝行動唔方便，我咪去佢屋企幫佢染頭髮囉！因為柏芝每日只可以坐一個鐘，所以我要分幾次幫佢整，其實呢個顏色柏芝想整好耐，但因為之前要配合電影同廣告，唔可以亂咁染。」
記者問Carr為柏芝染髮時會否不方便，他說：「係㗎，佢條頸未好番，唔可以用花灑幫佢沖水，只可以要佢仰卧，然後用盆水幫佢沖頭。其實嗰個色只係暫時性㗎啫，遲啲等柏芝好番，要睇吓佢有乜嘢新工作，再決定整乜嘢髮型！」

戴帽有助運程
風水師蘇民峰曾經批中張柏芝今年運程較差，昨日蘇民峰接受本報電話訪問時說：「衣着對風水冇幫助，但染髮同戴帽都對運程有幫助。張柏芝忌火，啡色係屬土嘅，火生土，土可以減弱火，所以對運程係好嘅，但千祈唔好染紅色，紅色會令到火更加旺。其實最旺張柏芝嘅顏色係白、金、銀、黑、灰、藍，忌嘅顏色係青、綠、紅、橙、紫。」
此外，柏芝昨日離開又一村寓所時，雖然未有停下來接受記者訪問，但仍禮貌地跟記者點頭打招呼。
而其父鬍鬚勇為不想記者追車而影響柏芝傷勢，更刻意慢駛。

「打麻雀消遣」
及後記者致電張豪龍，問柏芝近日有何消遣時，張豪龍竟開玩笑說：「打麻雀囉，講笑咋，佢𠵱家經常學嘢，好似睇書同學彈結他囉！」
採訪：何永寧、戴彩煥、張止寒
攝影：娛樂突發組