真係只可以用「機身細到嚇親，功能勁到爆燈」嚟形容Panasonic呢部SV-AV10。睇吓日本樂壇天后濱崎步做親身示範，SV-AV10竟然輕巧到可以用兩隻手指「捻」住，不過裏面就已經集合晒數碼攝影、影Video、錄音同播數碼音樂等多樣功能！大家唔好以為想擁有呢部絕強新機係一件好遙遠嘅事，SV-AV10喺上個星期尾在日本推出，呢兩日啱啱有水貨到港，價錢只係$2,980，相信好多人都買得起。
記者：馮彥彰 攝影：陳穎
一攞部機上手，感覺佢真係非常小巧可愛，好難想像一個咁小巧嘅機身裏面，竟然內藏4大「攝」、「影」、「錄」、「播」功能。首先係數碼攝影功能方面，SV-AV10使用了CMOS感光元件，鏡頭解像度達35萬像素，相片解像度達640×480，如果用作一般網頁相及拍生活照E-mail畀遠方親朋，絕對可以應付裕餘。此外機身重附設有內置閃燈，所以就算要作夜間拍攝，都一樣非常方便。
鏡頭的光圈為F3.6（定焦鏡），由於機身一切以簡單為主，所以並冇附設手動對焦及防紅眼等功能，規格算是一般。不過簡化了拍攝程序，對於初階用者嚟講，一按掣就完成拍攝，的確係好方便。
至於儲存介面，就用上現時日本最流行嘅SD記憶卡，如果以跟機的8MBSD記憶卡，大約可以影到45張數碼相。
SV-AV10另一強勁賣點，就係附設有影Video功能，至於短片格式則使用了MPEG4，可以拍攝到320×240解像度的數碼影像。此外，機身還配置有一個2吋嘅液晶體顯示屏，可以用來即時顯示拍攝完的作品。
筆者喺實地測試後，感到個顯示屏真係唔合比例地非常大，而且畫面都算幾清楚，真係值得一讚。再加上機身勁輕，由於佢採用咗全膠身設計，所以機身淨重只有98克（重量同一部手機差唔多），平時可以隨意放喺恤衫袋裏面，在閒時又可以攞出嚟拍吓，絕對改變晒以往攝錄影像的使用模式，成為一種隨身的消閒小玩意。
機身還設有一個AV-IN插口，可以用作輸入其他NTSC制式的視訊影像，筆者曾經用佢嚟接駁DVD機，然後再利用機內的錄像功能將DVD片段錄下，雖然影像質素一般，不過實際功能還有待發掘。
至於拍攝短片的長度方面，如果以跟機的8MBSD記憶卡作計算，在高壓縮的情況下大約可以拍到8分鐘有聲有畫的動態短片，不過都係建議用家都係要另買一張64MB記憶卡會較方便，唔使下下拍嘢都要就住就住。
感覺上，聽數碼音樂同錄音，都係一種因利成便嘅功能，橫豎已經「影」得又「拍」得，加多兩樣——播數碼音樂同錄音，都係一個順手，而且呢個亦係多媒體功能的潮流所趨。
佢同SONY嘅NetwalkWalkman一樣，可以對應ATRAC3音樂檔案格式，以跟機8MBSD卡計算，亦可錄到8分鐘的音樂，不過筆者唯一不滿佢並冇附送「音樂CD」轉做「ATRAC3」嘅工具軟件，不過據知日本方面會推出《SDJukeBox》的專用轉送及格式轉換軟件，不過𠵱家暫時未有，只可上網Download其他相類的轉換軟件吧！
至於數碼錄音方面，由於錄音「壓縮比率」比較大，8MB都可以錄到25分鐘，一般人夠晒使。
新科技大平賣
SV-AV10唔止係玩明星效應咁簡單，重係有大量好玩功能吸引買家，除設計及顏色吸引外，最正係All-in-One功能，一次過錄音影相聽歌同埋拍片，價錢上都幾經濟，市面要買部同樣功能機種，分分鐘要成四至五千蚊。
SV-AV10Panasonic產品資料
尺寸：50×87×28mm
重量：98克
華仁會
電話：23980280
地址：旺角花園街75-77號花園商業大廈五、六樓