經濟學人信息單位（EIU）二十年來，每年做兩次全世界城市（超過一百三十個）嘅生活費用調查，以紐約為指數基準（一百），量度各城市嘅生活程度。大家都知香港年年名列前十五名，但調查以美元計算，美元升，港紙又升，所以九七之後，香港嘅「生活費排名」急升，最新呢次，成為全球第三「貴」㖭。
呢啲排名其實冇乜重要，唔使緊張，但特區政府好鬼緊張，舊年八月已經做好一份內部調查（七大城市），香港排第四，喂，第四同第三有乜大分別啫，貴就貴啦，鄧廣堯使乜咁緊張，要公開半年前嘅調查，與EIU搞對抗？上次政府批評EIU對香港經濟過分悲觀（零點七巴仙），結果點？人哋啱，我哋政府錯囉。
其實EIU與特區政府兩個調查都係關心駐外人員（expatriate）嘅生活費用，以佢哋嘅生活習慣為調查焦點。呢班人住半山區?南區、出入五星級酒店、飲紅酒，佢哋嘅「平」與「貴」，與一般工人生活完全脫節，你話香港貴過倫敦，上海排名好高，香港同上海嘅競爭力下降喎，簡直笑話。
真正嘅競爭力來自普通打工仔嘅生活費用，特區政府下次做調查，唔好俾EIU嘅方法牽住鼻子走，一於懶理啲expat。
不如設計一個公屋租戶嘅生活費一籃子（公屋租金、茶餐廳早餐、街坊酒樓午餐、街市買餸煮晚餐、女人街買衫、出入坐巴士van仔、去機場搭機場巴士……），再比較吓倫敦、巴黎、東京嘅同類工人生活費用，包保香港唔會名列前十名！