《成報》創辦人七哥何文法去世，前晚設靈，昨日大殮。骨灰火化後會擇日放去圓玄學院供奉。何家上下，噚日皆沉默哀傷，而解穢酒就喺七哥生前最愛嘅福臨門擺。
嚟鞠躬者仍然好多，八方見到嘅有孫秉樞、張正甫、陳百祥、查小欣……孫秉樞話佢初初喺《成報》落廣告，後來同七哥由顧客變成老友；佢重話：「何老先生好勤力，朝朝喺陸羽飲茶，都一次過睇勻晒全香港報紙。」
勤力係成功原因之一，但非全部。八方知道早於四年前，七哥已知道自己身患絕症，但佢不動聲息，日日照常返工，暗中搵人接手；最後將《成報》賣畀陳國強，條件係唔炒人。賣盤所得億二，八千萬分予員工。
一個人行到最後一段路，不忘善後，牽掛夥計，仍是有始有終；難怪許多當日唔開心走嘅老員工都嚟送佢一程，例如本報突發大佬鄭明仁，又如已轉咗行嘅李純恩。講起李純恩，八方去年第一個寫佢離開《成報》。佢話現在專心寫書，最近著作係講香港人怕甚麼，搵咗李天命寫序；此外就帶團去旅遊。佢話旅行好好玩，不過，咁嘅場合不宜講好玩嘅事。
（圖）孫秉樞送何文法最後一程，佢讚七哥勤力。
E-mail：