昨日辰達永安（1189）股價突然急升22.2%，收4.4仙。經紀陳報料話，聽講有人最近頻頻與各大證券行會面，好似話想搞批股。
辰達永安喺5仙水平橫行多時。不過，自從佢舊年年底公布中期業績蝕咗1.3億元後，股價就一直唔多好睇，尤其係上星期多隻二三線股都急挫之時，辰達永安亦一度插落3.4仙嘅低位。
小初心諗，如果間公司真係想批股集資，股價做番好多少都係應該，如果唔係點搵人接貨？
不過，小初有一點唔多鍾意，就係久唔久就見到辰達永安大股東減持嘅消息，呢類消息令人存有陰影。
經紀陳講完辰達永安後，又懶叻咁講冠華國際（539），佢話一早講咗人哋都未散貨，噚日隻股升番17.8%，收53仙，就係最好嘅明證。小初向來對於輸過錢嘅股票，都唔會回頭望，所以任佢點講都好，都係唔會再掂。