楊采妮與男友邱韶智一同經營的「StarzImage」及「第一亞洲娛樂製作公司」，屢傳財政陷入困境。昨日有七名員工及兩名供應商相約到二人的寫字樓追數，結果大部分空手而回。邱韶智承認公司確有欠債，而楊采妮則未見出現。
楊采妮息影後與男友邱韶智合作經營形象設計生意，分別開設「StarzImage」及「第一亞洲娛樂製作公司」，並找來老友袁詠儀入股「第一亞洲娛樂」，但年來一直有傳他們公司出現財務問題，惟三人均對此作出否認。日前更有雜誌報道指「第一亞洲娛樂」拖欠員工工資及製作公司費用。
昨日有六名「第一亞洲娛樂」前員工、一名「StarzImage」的員工及兩名供應商，相約到楊采妮及邱韶智位於尖沙嘴的寫字樓追數，眾人甫到寫字樓，邱韶智一副有備而戰態度，從容地先請眾債主入會議室開會，而他則對記者說：「𠵱家香港經濟不景，裁員好正常，佢哋係咪追薪，我唔方便講，否則對其他股東唔公平。」其間未見楊采妮及袁詠儀出現。
當邱韶智與債主開會期間，一名自稱亦是供應商的中年男士到達寫字樓，他聲稱要向「第一亞洲娛樂」追討數千元欠款，他離去時表示：「我十一月開始追，追咗兩次，今次收到啦。」
邱韶智與眾人開會個半鐘後，一班債主一同離開公司，其中一位文儀用品公司的女負責人接受訪問時透露：「今日冇人收到錢，頭先話收到錢嗰個供應商，佢應該追萬幾蚊，之前收咗三千幾，重有八千幾根本就追唔到。我追七百二十蚊，拖咗幾個月都唔畀。」
而一位「第一亞洲娛樂」的前員工則激氣地表示：「成個過程佢（指邱韶智）都好冇誠意，猛叫我哋三十一號再上嚟。邱生好勞氣又拍晒枱咁，都唔知佢點解咁勞氣，佢份人係咁，永遠覺得人哋對佢唔住，我知好多員工都貼錢打工，冇糧出，之前員工去成都同法國康城嘅酒店同機票錢都係自己畀，我做到十二月，十一月中只出咗半個月糧，我要追番個半月糧、遣散費同雜費。」
該員工續稱：「佢半年前要求員工夾錢幫公司過難關，部分員工都有攞錢出嚟，但大部分人收唔番，我哋自己查過，上年十月份開始公司已經冇供強積金，嗰五個percent都唔知去咗邊，有人好有問題囉。我哋考慮會向警方求助，其實之前都去過勞工處，佢哋約咗勞資雙方喺二月傾。啲員工跟咗佢幾個月至幾年都有，佢認真反轉豬肚就係屎。」
而另一前女員工則謂：「兩個月前邱生話想喺上海開分店，𠵱家都不了了之，佢之前叫我唔好搵勞工處同記者，點知後來有雜誌出咗，我就連糧都冇得出，我一月十號已經出咗律師信畀佢。男嘅就用安撫，女嘅最叻做戲，冇乜邊個未見過佢喊，博同情。」
採訪、攝影：汪正文