一味窩輪：9030溢價低好抵買

58件新輪出爐，開市嗰陣，大家你眼望我眼，冇乜人做嘢，理由係未有正式成交之前，大利市機冇溢價、槓桿率等數據打出嚟，唔夠資料參考。
今日起，各報行情表豐富好多，一排排新輪嘅數據列晒出嚟，炒家揸住張報紙，可以容易比較唔同窩輪，方便落手揀貨。昨日成交金額4百萬銀已可以打入10大，保證今日冇1千萬都唔可以上榜。
介紹隻抵食嘅新輪畀各位參考。
滙豐Call9030收86仙，有近13球易手，成交金額排第4，8月到期，溢價得4.2%，槓桿率10.3倍。
滙豐（005）收88.25元，跌25仙。9030抵買，係因為溢價低，就算正股唔郁，溢價都應該增闊。正股郁，隻輪更犀利。睇耐少少，正股升1成計，就算平水，隻輪都值1.37元，好吸引。

短炒9029
成交金額最大嘅係中移動Call9029，收25.5仙，8月到期，溢價22.6%，槓桿率8.4倍。正股（941）波幅大，隻輪溢價自然較大，短炒可以諗吓。