昨日上晝在荃灣城市中心有個活動，係一家叫「中藥港」嘅公司慶祝成立四周年，順便搞咗個腫瘤診斷研討會。呢類活動，媒介通常興趣不大，不過今次例外，因為佢哋竟然請咗恒基集團大老闆四叔李兆基出席。
八方一早就到場。好彩，否則連李兆基個影都見唔到，事關佢早在儀式開始前一個鐘已到，逗留咗一陣就走。照計噚日落雨，唔使趕住去打Golf啫。在場有人估李兆基係因為身為城市中心業主，又支持醫藥（佢私人投資仁安醫院），所以咁畀面。
其實唔止咁簡單。四叔主要係捧中藥港主席蕭承忠場。地產界中人，都知道蕭氏兄弟好幫得恒基手，賣樓又得、裝修又得，總之大家關係密切。
四叔生日擺酒請少少人，蕭承忠亦有份；而八方聽聞，佢重係極少數非恒基高層，可以直入四叔辦公室嘅人。
（圖）四叔李兆基（中）畀面蕭承忠，出席中藥港公司慶祝會。
E-mail：