有幾個老友都過唔到年，喺農曆年前成為失業一族，突然冇咗份工前路茫茫，唔知係咪零售巿道都因此受影響。
波鞋街Sales訴苦Sam、水貨舖老闆高佬A、玩具業巨子C異口同聲話今年一月份零售反常地難捱，根據過往經驗，聖誕打後生意可一直旺到農曆年收爐。點知今年聖誕已經唔旺，聖誕一過後直頭靜到心寒，唔少舖試過一日只開兩張單，從未試過咁差。高佬A問係咪因為1月交稅月關係，所以啲人冇錢使？訴苦Sam話年年都係一月開始交稅，何況打工仔𠵱家興借稅，應該影響不大。玩具C提醒今年好多打工一族突然冇雙糧，有啲重擔心被老闆忽然Out消，點會有心機使錢？果然有理。玩具C話𠵱家做生意唔可以一本通書，睇番美國第三大連鎖零售商Kmart都話唔掂，但另一邊網上零售旺到暈，好多人唔肯面對問題最終被Out，唔止做生意，就算做公司領導層都一樣，玩具C推介快睇《誰搬走了我的乳酪？》，會有大大啟示咁話。呢排不景氣，興埋呢啲勵志書，重有本《窮爸爸富爸爸》又係好多人講，唔睇追唔上潮流。
主持人：大食Jack
八卦熱報：