人稱顧老闆嘅顧紀筠，佢打工嘅貿易公司喺銅鑼灣開設嘅Liliana鞋舖今日開張，噚日佢喺番禺做完華裔小姐競選司儀之後，今日就會趕返香港，出席舖頭嘅開幕酒會。
顧老闆日前表示呢間鞋舖嘅老闆投資咗九位數字，而顧老闆就擔任副總裁，佢日前話：「我嘅身分係打工仔，唔係老闆，今次開鞋舖嘅計劃，會先喺香港開設三間分店，然後再喺中國多個城市開連鎖店。」
問顧老闆鞋舖賣啲乜嘢牌子嘅鞋？佢話：「我哋賣意大利牌子嘅鞋，呢啲牌子好多大百貨公司都有得賣。」顧老闆為咗益老友，日前佢重帶咗一大叠請柬返去電視城派發，凡請柬內有佢嘅簽名就會有鞋送，佢呢個宣傳攻勢都幾大手筆。馮仁昭前日行過間鞋舖，面積約八百呎，布置方面都好舒服。
陳浩民舊年幫TVB拍嘅古裝劇《天子尋龍》（前名《大唐龍珠》），如無意外嘅話，應該緊接《無頭東宮》出街，馮仁昭聽聞呢套劇都加咗唔少後期效果，又加咗啲特技，製作部嘅高層都覺得呢套劇唔錯。今次呢套劇集咁快播出，咁啱陳浩民喺內地拍嘅劇集《銀鼠》又喺下個月全中國播映，一下子咁多作品出街，所以呢排陳浩民一啲都唔受同葉璇嘅緋聞影響，心情重唔知幾靚。
施念慈日前正式成為陳鴻業太太，不過施念慈並無放棄佢嘅理想，會繼續出書做女作家，同埋喺新城開咪做主持，希望做個家庭事業兩者並存嘅現代女性。陳鴻業對佢老婆嘅做法固然好欣賞啦，但其實陳爸爸對呢位新抱更加讚不絕口，陳爸爸重同啲朋友講：「我個仔真係好有福氣㗎，娶到咁好嘅老婆。」睇嚟施念慈真係好得老爺奶奶嘅歡心。
許晉亨自從同緋聞女友陳法蓉冇來往之後，許公子依然不愁寂寞，周不時都會去蒲吓夜店，又出席派對。平日許公子文質彬彬，但原來佢跳起舞上嚟都幾有個人風格，尤其係當佢fing手，單腳屈膝「咪」腳尖嗰下，舞姿同譚詠麟真係好相似。所以周旋喺佢身邊嘅美女，一見到許公子唔知幾鬼開心，個個笑到合唔埋口㖭呀。
前晚「中國木村拓哉」李雲迪喺文化中心演奏，吸引咗唔少官紳名流出席，就連早排懷疑心臟有事嘅陳自強，亦抽空捧場。陳自強同馮仁昭話佢健康好好，但喺現場睇就覺得佢比以前清減咗啲。不過，陳自強嘅扮靚心情依然旺盛，着到成身花碌碌出現，遠遠就見到佢啦！