今日係窩輪市場嘅大日子，58隻新輪掛牌，相關藍籌有長實（001）、滙豐（005）、和黃（013）、中移動（941）、聯通（762）、電盈（008）、新地（016）、恒生（011）、華創（291）、利豐（494）、中信（267）等，另有恒指輪，Call輪總共41件，Put輪17件。
新輪暫時唔易大升大跌，新輪推出市場，反應麻麻，發行商大把貨未銷，要慢慢化出去，阻住啲輪價上升。簡單嘅揀輪原則：（1）溢價最好低啲、（2）槓桿率最好高啲、（3）年期最好長啲、（4）交投最好旺啲、（5）相關正股通常波幅最好大啲、（6）發輪商喺窩輪市場活躍程度愈高愈好。
引伸幅度愈嚟愈多人講。引伸幅度愈大，代表窩輪波動愈大。不過，唔係好多人有辦法知道引伸幅度數據。唔使理，相關正股波幅大，槓桿率大，則窩輪引伸波幅必然大啲。
新輪今日登場，舊輪有難。中移動Call輪1715最危險，快趣1仙求售。中移動跌幅已大，再跌風險有限，可以先昅住中移動新Call輪，候低入貨。