內地企業來港招聘人才，係一件大好事，主辦單位值得稱讚。中貿林有自己生意，唔使去應徵，但收到一張傳單，邀請各方人士參加一個晚餐會，英文名為MasterlyDinnerofPRCEnterpriseLeaders，佢睇極都唔明乜嘢叫做MasterlyDinnerof，每位收成千五銀，好貴噃，何況係喺會展中心食，即係話，每張飯票嘅價錢，會有大量溢價，算係同中國企業頭頭見吓面、握吓手嘅入場費。
照計與內地企業領袖食飯，以中文（國語）為主，未必要用英文；不過香港既然係國際城市，或者會有歐西、日韓泰星馬印人士參加，用英文亦無可厚非，不過主辦人就應該搵啲識英文嘅人去草擬傳單，唔好笑死外籍人士。
中貿林睇極唔明之後，搵啲中文譯本（或者英文先至係譯本）嚟睇，原來晚宴名稱係「中國強勢企業領袖晚宴」，幾乎笑到噴飯。啲成年人成日話啲大學生英文唔好，中學生唔識英文，小學生唔識ABC，喂，啲成年人點可以寫得出MasterlyDinnerof......出嚟呀？譬如睇吓CNBC，佢哋有一個節目叫做PowerLunch，如果老老實實去照抄，老外一定睇得明嘅，就應該叫做PowerDinnerwithTopPRCBusinessLeaders。中貿林問左丁山點睇，左丁山見怪不怪咯，平時收到一啲公關公司嘅英文稿，都時有文法錯誤嘅語句啦，改都唔改得咁多，慳番啖氣暖肚好過。