入冬至今，羊蛇鹿雉，食完再食，如果再無新衝擊，味蕾就不再靈敏，味覺變得遲鈍，唔想咁樣？等各式隆冬當造貝類救救你。來自印尼、南非和南中國海，位位膏多肉滑、鮮甜如蜜，諗起都興奮，問你隻為食鬼點忍得口！
記者：楊一凡
攝影：謝耀恒
來自印尼的蟬蝦藝名多多，例如豬仔蝦、珍珠龍蝦及琵琶蝦，蝦肉的味道和質感極似龍蝦，不過鮮味更勝一籌。冬天食蝦膏至多至香滑。蟬蝦售$8一両。
把切件的蝦肉用油泡一泡，令肉質結實，就算大力翻兜，肉塊都唔會散開，走油後用上湯煮片刻，至乾身後，加入店方秘製的醬汁炒至剛熟。
陳先生試食：
蝦肉好鮮甜和爽口，個醬汁好香，帶些少辣，XO醬同蝦味好夾。
飯粒炒得煙韌美味，再加上蝦膏，啖啖香滑，大部分蝦膏都完全融化在飯粒當中。蝦膏炒飯只收油料費，二人分量的炒飯約$30一客。
車蠔又稱鮮瑤柱，真名是紫斑海菊蛤，哇，靚絕，美豔的車蠔來自南中國海，味道很清，但清中帶蜜糖般的甜，不適宜玩蒜茸麻辣，最適合不過的還是清蒸。車蠔售$8一両。
先用上湯煨熟冬菇絲、粉絲、冬菜和薑絲，最後才加入車蠔，打個玻璃芡便可出場。高湯扒海鮮是水上人家晚飯必備的菜式，淨食美味，撈飯又得，連湯水都慳埋。
要是你嫌蒜茸粉絲清蒸車蠔太平淡，大可試試這個酥炸菜式，同樣咁清甜但入口多了一分香脆，炸海鮮菜式少不老拍檔——喼汁和沙律醬。
法國遊客試食：
外層好鬆脆，炸得好乾身，脆皮鎖着水分，咬開仍然多汁鮮美。
不是人工飼養，全程天生天養的南非鮑魚，鮑魚味極濃，肉質柔軟，點煮都唔韌，南非鮑又名孔雀鮑魚，天氣愈凍愈肥美。南非鮑魚售$18一両。
把鮑魚拖水後，用上湯煨至入味，然後蘸層薄薄的漿粉，炸至金黃，之後便可跟辣椒和淮鹽齊齊落鍋，兜呀兜，直至大家融為一體，鹹香卜脆。
燜鮑魚前先要預備大鍋高湯，湯料有老雞、瘦肉、火腿骨和藥材等，大廚替眾鮑魚淨身後，便一一放進高湯「入浴」，全程用慢火扣至入味，需三至四小時。
林小姐試食：
鮑魚燜得好腍好入味，湯汁香濃但不會搶去鮑魚鮮味，整體不會太鹹。
店名：全記海鮮菜館
電話：27911195
地址：西貢海傍街53號地下
座位：150個
營業時間：朝11晚11
付款方法：現金及信用卡(Master,Visa)
代客泊車：星期一至五晚上6時至11時免費。
備註：所有海鮮收費均以海鮮數量計算，另加油料費，而油料費則視乎人數而定，二至四人分量，每味海鮮約收四十多元。