上周蘋果日報慈善基金喺社聯協辦下舉行咗撥款行動簡介會，當日吸引咗百幾間社會服務機構，派出成百幾人嚟參加，比預期踴躍，搞到要臨時加開一場，以回應機構對蘋果基金嘅支持。當日出席嘅除咗蘋果基金愛心基金委員會主席許賢發太平紳士，重有新加入基金做董事嘅基督教家庭服務中心總幹事邱可珍太平紳士，同埋壹傳媒集團財務部及法律部兩位董事成員。開始嘅時候首先由發叔同大家講吓基金嘅歷史，蘋果基金喺九五年誕生，𠵱家經濟環境唔好，但捐款數字都好高，一路都得到好多善長嘅支持。發叔重承諾基金將每三個月開會一次，盡快審批每個機構嘅申請。
之後，由基金總幹事同在場人士講解基金嘅運作，而兩間受惠機構亦同大家分享多年來與基金嘅夥伴關係，並已分別為機構籌得以十萬計甚至以百萬計嘅善款，令受惠人數愈嚟愈多。大使睇到在場人士個個都聚精會神咁一邊聽嘉賓嘅分享，一邊就猛咁寫筆記。到咗發問時間，大家都好踴躍，問題一個接一個，大使見機構同人最關心嘅都係點樣申請基金撥款？有乜嘢審批資格？撥款上限有幾多？同埋點樣轉介個案求助？點樣可以同蘋果基金合作為有需要人士籌多啲錢？講到底基金嘅使命係去幫人，令社會上更多貧苦大眾受惠，學發叔話齋你哋申請，我哋撥款。今季申請基金資助社會服務計劃嘅截止日期係二月二十三日，有興趣嘅機構就要快啲寫份計劃書嚟嘞！
暖流熱線
電話：29908688
傳真：23702192
電郵：
網址：