傳媒舊年報道過，煲呔曾同細佬曾蔭培曾接受九龍華仁書院七位中三學生訪問，講到自己童年怕鬼的趣事。
原來此事還有後續，事關一個專門講述鬼怪靈異事件的網站「雲海網」，根據此事選出曾氏兄弟為二○○一另異（另類靈異）公眾人物。
訪問中，煲呔話上環東華醫院陰森恐怖，因為有義莊、殯儀館和紙紮舖，所以細個時，好驚去嗰度。
一哥就因為幾兄弟童年時，鍾意深夜聽電台鬼古，聽完又覺得好恐怖，所以最怕父親叫他落街買消夜，一買完就雞咁腳跑返屋企。
網站解釋兩人得獎原因都幾有趣，佢話此事令人覺得世界好公平，幾高級嘅人原來也可以怕鬼，重話為鼓勵公眾人物大膽講述自己靈異經驗，所以選曾氏兄弟得獎。
煲呔、一哥只係細個嗰陣怕鬼，又唔係撞鬼，無啦啦成為靈異典範，相信都幾無奈，世事就係咁。
（圖）一哥（左）與煲呔（右）因為童年怕鬼的趣事而獲獎。
E-mail：