去年，為了減少是非緋聞，霍汶利毅然改名為霍紋希，相士講明，改這個名可以避開是非，但效果卻如她說：「一樣咁多！」
由飛圖娛樂到今天英皇集團，霍紋希一手捧紅了謝霆鋒、陳奕迅、容祖兒和Twins，風頭一時無兩。代價是每日睡不足六小時，生活晨昏顛倒，體重暴增三十磅，而且還得到了明星的專利——緋聞，壓力使到她透不過氣來。
記者：朱文俊
攝影：黃子偉
祖兒搞基得啖笑！
霍紋希（Mani）自言，一直以來都清楚明白，自己在事業上所走的路。無論之前在連卡佛做月薪三千五百元的售貨員，到客串做卡拉OK影碟女主角，再到現在掌管英皇集團藝人管理。她都明瞭自己的強項在管理、在解決問題。所以多年來，無論轉了多少份工，換了多少個老闆，Mani依然朝這個方向進發。
「每日一擘大眼，就係要解決問題，不同部門同事，各個傳媒都會來問我數十個奇難雜症，我都要一一應付，解決難題變成我嘅專長。加上我經常要面對傳媒，好容易令人覺得我好高調，但其實由我開始替藝人做經理人開始，我已經同自己講，無論人哋出幾多錢，我都唔會再走到幕前。」
近日，容祖兒被指與何韻詩關係親密，作為一手捧紅她的經理人Mani，面對這次「基的疑惑」，卻一反平日親切的態度，還是事出突然，未知如何招架？
事後她解釋因《忽周》想直接約祖兒訪問，無禮在先，但最後也替他們安排了。「其實佢哋唔係搞基，我哋三個聽到都只係得啖笑。」與為仔仔女女爭取機會，努力上位相比，也許還是後者比較容易應付吧！
「當初為祖兒接~H2O+廣告，係因為我喺出面聽到人話~H2O+要搵廣告代言人，就膽粗粗Send咗祖兒啲相過去，然後再跟進，同嗰邊保證呢個係力捧新人，最後爭取到Casting機會，對方要求我哋去佢哋辦公室見老闆娘，但我知道佢哋Office燈光唔靚，所以堅持去酒店CoffeeShop會面，加上當時祖兒派台新歌《未知》去到第三位，對方考慮咗三日就拍板應承。啲人成日以為我哋公司，出好多錢捧新人，其實好多時候係我哋咁樣捱番嚟。
「諗起之前做何嘉莉經理人嘅時候，我會覺得有啲可惜，有啲黯然。佢一出道時就好多人識，第一隻EP就賣成五萬隻，連其他唱片公司都不停打電話嚟問我攞碟，想知呢個新人點解咁掂，當時佢嘅Fans層面好大，由三歲到八十歲都有，唔係誇張，真係有婆婆攞住隻碟叫佢簽名，但因為佢唔識同人溝通，好多時講完一番說話，都唔知自己講咗乜，因為咁得罪咗唔少人，真係好可惜。
英皇集團近年在娛樂圈大展拳腳，成功捧出多個受歡迎的藝人，包括謝霆鋒、容祖兒及Twins，無獨有偶，以上藝人都是在未成名前，由Mani一手照顧，所以有人稱她為紅星搖籃，對此，Mani有感而發：「講到話我一個人捧紅霆鋒、祖兒、Twins，其實係唔公平，我相信冇一個經理人，可以自己一手一腳捧紅一個藝人，我哋講緊嘅係TeamWork，可能因為我做咗經理人九年，面對傳媒時間較多，所以大家都比較錫我，將功勞畀晒我，再加上以前公司規模冇咁大時，好多嘢我哋都要自己落手落腳做。
「試過中秋節要送果籃畀每間報館做推廣，為咗想慳番五十蚊送貨費用，我自己搭巴士，逐間逐間送去，喺公司有時甚至連剪片都做埋，正因為知道每一個工作崗位上嘅難處，所以容易同人溝通，到我帶住藝人嘅時候，無論去傾廣告、推廣、宣傳都較為順手。」
能夠將不同新人包裝捧紅，究竟秘訣在哪裏？Mani肯定地說：「第一，親近群眾，以往明星都高高在上，但我會將手上藝人訓練得親民，只要唔影響形象，佢哋鍾意喺街邊篤魚蛋就篤魚蛋、鍾意行街Shopping都可以，千祈唔好同群眾太過分隔，例如多啲安排藝人去商場表演，都係希望多啲人去接觸佢哋。第二，係我明白到平面Press用途，一個新人要令觀眾認識，平面媒體係一個好嘅開始，可以令觀眾知道佢哋嘅背景，對佢哋有個初步認識。第三，係推廣，做一個新人其實唔係有好多Budget，所以一定要搵贊助商。」
做了九年藝人經理人，放假加起來都不超過兩星期，每日工作超過14小時，再加上緋聞等壓力，令視工作如生命的Mani，毅然改了一個會影響工作運但能改善人緣、減少是非的中文名「霍紋希」。她表示：「是非嘅嘢，真係身不由己，惟有盡量收埋自己，我相信如果我做得好的話，公司會讚賞我，而且退一步嚟講，講公司是非嘅，都唔會講斟茶個阿嬸，有人講我，我咪安慰自己，係因為我工作有表現，所以人哋戥我高興。
「我覺得除咗是非困身之外，最大壓力可以話係來自做新人，因為個新人一出嚟，好快就知得唔得，唔掂嘅要救都無能為力。我嘅減壓方法就係盡量抽時間，同屋企人食飯，同埋放假、放假、放假！過農曆年會一家人去旅行。
提到感情問題，一直口若懸河，滔滔不絕的Mani即時沉默下來。「真係負擔唔起感情責任，好似我𠵱家由朝做到晚，一個星期隨時返足七日，根本冇時間陪另一半，相信佢亦無可能接受到，所以即使咁多年以來都有人追我，但我一直將大家關係，控制喺朋友階段，唔會當對方係一個固定對象，有時同自己講，愛情嘅嘢，試過就算。何況，我媽媽都唔畀我拍拖，佢驚我連每星期陪佢食一次飯嘅時間都俾人搶埋呀，哈哈！」
＊王傑與英皇提早解約之前，曾與Mani鬧緋聞。
＊傳與謝霆鋒拍拖，因而對他處處維護，偏袒對方。
＊傳與古天樂相戀，向英皇極力推薦。
＊被目睹與陳浩民約會，緋聞不脛而走。
＊被指橫刀奪愛，與張惠妹前男友周立璟約會。
原名：霍汶利
年齡：30歲
履歷：第一份工作是在連卡佛當售貨員，月入$3,500；其後在日資製作公司當市場推廣，九年前加入飛圖娛樂（英皇前身）。曾客串當模特兒、與許志安拍過《雨後陽光》MTV，也曾為嘉頓餅乾拍攝廣告。第一位負責的藝人為趙學而。