上個星期靚女經紀同小初講，話太平協和（438）好似想搞作，佢話太協呢排好積極，除咗喺香港有樓賣之外，重頻頻硬銷佢嘅上海地產概念，重一再帶人去上海參觀，所以靚女覺得會有搞作。
太協上周五升3.2%，收64仙。小初記得，太協舊年12月，公布用咗成2.8億元，收購上海A股公司運盛（上海）5成股權後，股價一度炒上去70仙樓上，不過好快就回落。
今次太協如果係有心炒上嘅話，小初覺得要升穿上次高位其實唔難。不過，小初記憶中，覺得太協呢系股票唔易玩，多年前由M君打理時如是，現時又傳話V君會幫手，小初更驚多兩錢重。
靚女聽完有啲唔順氣，佢話太協起碼唔係小初鍾意嘅二三線炒股，分分鐘可以一日跌八成，叫小初唔使咁「騰雞」。
此外，文化傳信（343）近排喺40幾仙水平徘徊，但有人話隻股重未玩完，有機會再升穿50仙水平咁講。