雖說一早「預咗」，雖說早已有心理準備，然而，接到大信封時，心裏仍是那麼的難受。心理有準備又如何？生理完全沒準備好！被裁員的你，先是憤怒，繼而好累，然後不舉；即使勉強舉得起，那話兒也像千斤重，需要起重機輔助。
強伯活了那麼久，當然試過不只一次被裁員。每次被裁，都感到非常「冇癮」，每次都有十萬個問題，不知道問誰才有答案。你有沒有問過這些問題？我有。你有沒有找到答案？我冇。
●做了那麼多年，為甚麼今時今日才「忽然」覺得我多餘？
●張黑名單係邊個冚家鏟擬定的？
●我不是沒有功也有點勞嗎？我不是差不多天天也超時工作嗎？
●為甚麼不炒某某而炒我？某某咁渣都好過我?!
●是不是我已經沒利用價值了？
●有事就搵我，冇事就炒我？
●點解唔炒嗰個鬼佬？貪佢唔識講中文？我夠識只係講英文唔講中文咯，嗱：fxxkhim，fxxkyoutoo.
●嫌我老？我後生時你又唔炒我?!
●當初請我來這兒打工的人呢？躲了在哪？
●（開始心慌，放下尊嚴）：減薪都唔得？一定非炒不可？
●點樣話畀我個女人知？點樣話畀啲細路知？阿媽問起點講好？
●明天繼續「扮」返工，直至搵到工才把真相告訴家人？
●點算？點算？點算？點算？
雖說一次生，兩次熟，然而，經歷過多次被裁員的強伯，每次拿着大信封，仍是不大知道怎算。也許再被裁多幾次，自會熟能生巧，接到大信封時，懂得摺隻大飛機來玩，不再勞氣，不再唔知點算。（還幸強伯無樓無車可供，唯一需要供的，就是被煮飯婆逼供行蹤，謝天謝地！）