下周一暫別Fans
容祖兒留學兩月延歌壽

繼陳冠希下月赴美進修後，英皇另一歌手容祖兒昨日又宣布，為了令自己在樂壇的壽命更長久，故推掉所有工作，出外進修兩個月。

英皇一姐容祖兒（Joey），日前接受本報專訪時，曾透露有意今年出外進修，以延長自己在樂壇的壽命。昨日身穿Zucca短裙的Joey，往九龍灣德福廣場出席「地鐵商場馬不停蹄為公益」活動時，正式宣布她將於下月四日（下周一），出發往美國、英國及日本三地，進修音樂及舞蹈，為期兩個月。

「我真係好攰」
Joey昨日說：「唔知點解啲fans比平日瘋狂，可能佢哋知道我會出外進修啦，其實我真係好唔捨得，近排我真係覺得好攰，成日俾記者跟。好似噚日（指前日）我同媽咪去便利店買嘢，都無端端有個記者彈出嚟影相。加上我喉嚨有事，把聲真係要休養一下，到時只會由媽咪陪我，學費亦係自己畀。」

推掉廣告電影
Joey突然出外進修，會否怕被認為她遭雪藏？Joey解釋說：「點會喎，楊生（指楊受成）知道都好支持我。其實我一直都好想好正統咁學吓唱歌同跳舞，而唔係因為有太多新人湧現。
「或者到時我用視像會議見大家，現場直擊，你哋咪唔會亂諗囉。我一定會養番好把聲，返嚟再戰江湖。」
那麼Joey會否跟打算往美國進修的陳冠希一起上堂，Joey說：「唔會啦，佢搵私人教授，我就係一班人上堂。」
此外，Joey的經理人霍紋希則表示，為了讓Joey出外進修，替她推掉了兩個廣告及兩部電影。
採訪、攝影：甘比