星期六陳太現身時代廣場，為伸手助人協會義賣曲奇，成績驕人。噚日就輪到周梁淑怡、馬逢國同呂明華同一班藝人；周梁當然唔想輸畀陳太，所以八方昨日所見，周梁最賣力。
其實三位議員賣餅各有策略，周太有理冇理就「隊」包曲奇埋對方心口，一聲「幫吓老人家啦！」雖然第一個目標一聽要三十五蚊一包餅，就「嘩」一聲彈開，但其他人通常都會乖乖掏出荷包；再加一招打蛇隨棍上，一見五十蚊紙，就游說對方買多個十五蚊嘅公仔；呂明華唔同人爭，跑到八方都見唔到的地方搵食。
馬逢國面皮薄好多，一聽到人話嫌貴就不知所措，有位外籍女士想買，但只捐十八蚊，馬逢國拿拿聲補十七蚊，賣包曲奇畀對方個女，唔止一次貼錢做生意。佢帶埋讀中四嘅仔仔馬彥龍，雖然義賣前仔仔坐在靚女明星黃伊汶身邊，但就好cool，望都唔望靚女一眼，只顧住幫爹哋錄影，都算乖仔。
（圖）雖然義賣曲奇所得全歸伸手助人協會，但係周梁每做成一單五十蚊嘅生意，仍然開心到好似發達咁。
E-mail：