在今年初樂壇頒獎禮一同競逐新人獎的何韻詩與陳文媛(BoBo),彼此皆是玩得癲的人,結果贏了獎項更贏了友誼。而最新一期《忽然1周》亦報道何韻詩跟容祖兒的親密關係,看來何韻詩除BoBo以外,還有祖兒做她的好姊妹。
BoBo日前在尖沙嘴接受記者專訪時,待何韻詩走開才夠膽說:「你知啦,佢個樣唔出聲真係好鬼寸,所以第一眼見佢咪以為佢係寸星。不過識落佢係一個癲婆嚟㗎!你哋要小心。當日我夠膽撩佢講嘢先,因為大家都係貓癡,所以係貓嘅話題令我哋開始友誼。」
何韻詩其後不甘示弱說:「我都估到你話我寸,我個樣唔出聲似惡婆。我夠俾你呃咗,第一眼睇你個樣以為好斯文,查實扮嘢!」
BoBo說:「喺呢行搵到交心嘅朋友真係唔易,雖然唔係話唔啱傾,但見面只會SayHi,阿詩同我可能都係玩得好癲嘅人,所以好夾,起碼講嘢大家都唔會就住就住。」
何韻詩說:「喺友誼方面我一向都得,可能係我同人交往好真嘅關係,但我發覺呢行好多人都對人有戒備。我鍾意BoBo心胸廣,起碼成日俾我窒,佢識得反擊,唔小器,我最怕同啲成日好鬼嚴肅,愁眉苦臉嘅人相處。」
陳文媛說:「雖然何韻詩今年新人獎呼聲最高,不過我從來無當佢係頭號對手,亦無諗過要贏佢,輸畀佢我都好開心,相信我哋諗法都係一樣,做好本分就得。」
何韻詩說:「我最妒忌BoBo嘅美色,同行冇乜好妒忌,我字典裏面從來冇同行如敵國呢回事。」
曾被阿詩踢爆與陳冠希遊日本的BoBo說:「其實嗰次佢講笑啫,因為我從來都冇講過秘密畀佢聽。佢唔好有新聞,遲早我都會玩番佢。」何韻詩即時補鑊說:「嗰次玩吓啫,做人唔係吓吓都咁正經,有時儍吓,講吓儍話幾好玩,佢鍾意㗎!」
陳文媛說:「各位男士,你哋有冇留意何韻詩早排揸車時俾個男人爬頭、佢夠膽落車同人爭拗嘅新聞,從呢件事睇出佢護花能力好強,男人可以將終身付託畀佢,包保出入平安。」
何韻詩說:「佢個真名叫陳名媛,所以我希望佢快啲釣個金龜婿,嫁個有錢人,做真名媛。」
撰文:盧雪琪 攝影:林德雄
飾物提供:Smile 場地提供:小路吧