通縮停不了，去年十二月嘅綜合消費物價指數下跌百分之三點六，已經係連續第三十七個月下跌。正因如此，服務行業啲收費根本冇法子加價。
到中國會食飯，碰到印刷R，佢大吐苦水：「我哋同人印年報、定期報告，每年例牌要投標一次，用番舊年收開嘅價，差唔多輸梗，因為一定有人平過你好多。我哋算好彩，仍然捉緊啲舊客，但價錢就連續三年遞減，你話唔叫職員減薪，我點可以頂得住。」
人哋平好多，點解印刷R重可以keep住啲客？印刷R話：「全靠我哋有良好紀錄，印刷好、設計靚、啲公司鍾意，不過例牌哦我哋話：人哋好平喎，你要畀個理由點解我要搵你，減啲價啦，通縮呀。於是我可以照舊做，但收少過舊年。」
左丁山話：「不如大佢啦，睇吓佢夠唔夠膽畀最平嗰間做，唔通唔怕孭鑊？」印刷R話：「重要交租畀人工，唔敢大佢。」飯後鬆人，等𨋢時份碰到賓架L，問佢感唔感覺到通縮，賓架L話：「梗係有啦。我哋一個客想上市，要換核數師，要用五大之一嗰種，收到嘅標書，一兩份平到你唔信，相比之下，我哋嘅收費都要向人客justify，幾冇癮㗎。」
服務費通縮，不知何時到底，以前話通脹肆虐，現在我哋知道通縮亦可怕。固定支出不能減（如供樓、學費、交通費）嘅情況下，啲變動支出（如飲食娛樂衣服）冇法子唔cut，但香港人嘅固定支出（供樓）太多，減薪係好難頂嘅。