喺呢幾個星期DVD碟一直冇乜新貨返，搞到好多戲迷大吊戲癮！不如就趁住呢段空檔時間，睇番啲香港經典電視劇嘅VCD啦！須知道唔係套套電視劇都咁好睇，如果亂買就實在太嘥錢啦！大家不如聽吓舖頭推介，反應最好嗰幾套，就一定信得過。筆者發現最好賣嘅劇集都有一個共通點，就係劇入面個個演員𠵱家都好紅！
記者、攝影：馮彥彰
劇名：《他來自江湖》
演員：周星馳、萬梓良、毛舜筠、吳孟達、恬妞
價錢：約$260
粵語對白中文字幕
據碟場老闆表示，現時最好賣嘅香港電視劇VCD，首數周星馳嘅上位之作《他來自江湖》，雖然頻頻入貨，不過亦好快賣晒！
《他來自江湖》可以話係星仔同吳孟達呢對影壇活寶貝，喺電視劇中首度合作搞笑魅力之作，劇中好多經典口頭禪，直到今日都一樣好多人重講緊，好似「咩咁大支嘢呀﹖」，大家有時同人傾偈時都會有機會聽到！但唔講大家都可能唔記得，其實佢係出自《他來自江湖》㗎！雖然呢句口頭禪，多數都係出自何英標（吳孟達）口中，不過每次何英標講呢句時，都係發作喺何鑫淼（周星馳）身上。
全劇主線講述萬梓良（明天）同周星馳（何鑫淼）一段義氣故事，再加上愛情、笑料同溫情等多樣元素，絕對將星仔講笑話嘅天分表露無遺。
劇名：神鵰俠侶
演員：劉德華、陳玉蓮、梁家仁、萬梓良、歐陽佩珊。
售價：約$220
國/粵語對白中文字幕
古裝武俠片，係香港電視壇最長青嘅劇種，而且收視亦例必高收！如果講到古裝武俠片經典，就一定係劉德華同陳玉蓮拍嗰套《神鵰俠侶》，因為當年華仔同蓮妹拍此劇時，正係佢哋最靚仔靚女之時。
據賣VCD嘅店舖表示，買呢套碟嘅人，佔咗好大部分應該係華仔Fans（好多人公認華仔呢段時間最後生靚仔），不過如果喜歡睇古裝武俠片嘅人，呢個亦係必買之作。想當年，呢套劇可以話用盡無綫全台最大卡士製作，當中必睇係風華正茂嘅陳玉蓮同歐陽佩珊，造型真係靚到殺死人，而且當年拍電視劇都算尊重原著，唔會將故事內容改到亂晒龍！古裝武俠劇迷必睇！
劇名：獵鷹
演員：劉德華、葉德嫻、梁朝偉、陳敏兒。
售價：$190
國/粵語對白中文字幕
《獵鷹》都係算近期幾好賣嘅電視劇VCD，1982年劉德華就係憑着呢套《獵鷹》一劇走紅，而且亦係華仔首套擔正做電視劇男主角嘅「響朵」之作。
睇呢套劇時大家唔好誤以為睇緊《瘦身男女》，想當年華仔拍《獵鷹》時係一個170磅嘅肥仔！不過講到演技，每個演員都做得好稱職，尤其係做劉德華母親嘅江霞（葉德嫻），真係好好戲！再加上劉華嗰個卧底造型，當年都唔知冧死幾多人，證明李添勝監製無選錯人。
價錢：$660
國/粵語對白
中文字幕
後生靚仔版《射鵰英雄傳》，當年的超大製作，單係碟都有三輯（共35隻碟），有排睇！肯定是香港電視史上黃金時期的作品，製作大型，卡士又勁，三輯都唔同人物，唔睇過唔知黃日華後生時有幾靚仔。《射鵰英雄傳之鐵血丹心》當中演員包括有翁美玲、重有謝賢同蘇杏璇。全部昔日明星一次過可以睇晒！
無綫最新劇集VCD網址：
售賣點：DVSHOP 地址：九龍深水埗福榮街107號舖 電話：21949100
售價：約$380 區碼：3區
碟數：DVD×4（16集）
中文字幕
雖然韓劇近年在香港大熱，不過一直都未有正版DVD韓劇返貨。好在最近香港終於有代理引入行貨版韓劇DVD，暫時已知最Hit嘅《藍色生死戀》已經見街有得賣，而且售賣點大家亦唔需要周圍搵，因為大家可以喺總有一間喺左近嘅7-11同DVD舖度買，雖然係就係遲咗啲，但總好過冇呀！
此外，筆者重收到風，有韓國第一美女之稱——金喜善，由佢所主演嘅《忽然情人》行貨DVD，亦喺呢幾日啱啱見街，呢套戲可以話係佢近年代表作。《忽然情人》是一套愛情加劇情片，劇中刻劃嘅感情世界非常複雜，並同時反映出現實社會嘅殘酷，再加上少少韓式變態男女嘅新戀愛觀，絕對值得一睇！另外，傳聞《泡沫愛情》都會在日內返貨，睇嚟本地繼日劇之後，又有韓劇加入戰團，戲迷唔怕冇嘢睇啦！
記者：馮彥彰
售價：$110
查詢電話：27621244
ChristineSamson係七十年代風靡東南亞及美加嘅勁Band「D'Topnotes」主音，甜美聲線得天獨厚，歌唱技巧亦達爐火純青，現在加入個人風格重新演繹多首英文金曲，包括《JohnnyAngel》、《Lover'sConcerto》及《WillYouStillLoveMeTomorrow》等金曲，難怪憑五十年唱片騎師經驗打入健力士紀錄大全嘅名DJUncleRay，都為呢隻大碟加入五段獨白作引子。
大碟同名新曲為《LetterToMyFirstLove》，及其他經典金曲並非只將舊歌翻錄了事，而係認真地由多位頂級樂手把音樂全新灌錄，兼且搵嚟國際級製版大師BernieGrundman親自處理全碟製版，獨有技術將音質進一步提升，令音色層次分明，發燒級Hi-Fi玩家值得珍藏。
文：YannLau