昨日啲二三線股仔多數唔掂，小初終於忍唔住將高位買入嘅冠華國際（539）止蝕沽出，好彩小初喺50仙樓上走咗。小初嬲得滯，於是打電話鬧鬼經紀陳，佢猛saysorry，但就堅持話坐貨最多班友未走過，只不過係大市唔就股仔，所以要唞一唞。
唞一唞都跌咁多？知唔知要做番上去要幾大能量？下次小初都係做定功課至上車，就算有消息都係咁話。
好彩另外一隻股仔第一電訊（8110）仍然硬淨，噚日周圍兵慌馬亂佢都冇事，重再升2.3%，收90仙。經紀陳話，第一電訊一來貨疏，二來後台夠硬淨，稍後市況如果相就嘅話，重可以抽高啲。
小初心諗，呢樣嘢邊個可以擔保，希望到時真係有表現至好。近排股仔表現唔多掂，繼先前科達（673）、耀科（143）急跌後停牌，噚日又多一隻惠揚（231）大跌74%後停牌，睇落二三線股仔真係要學經紀陳咁話，要唞一唞先掂。