恒指第3日下跌，跌幅20點。窩輪市場冇乜大製作，升得最勁排第1位嘅，都只係6.7%，係光控認購輪1758。
1758今年3月底最後買賣，收1.6仙，升1格（0.1仙）就做咗輪王，行使價8.45元，正股𠵱家做緊5.35元。唔多使問，過多一排，隻輪只會掛1仙求售。
陸氏公司輪360，收33仙，升6.5%，做咗阿2靚輪。陸氏呢排有啲動作，以2千幾萬買入主席私人生物科技公司權益，又頻頻回購，可以睇好啲。隻公司輪數據亦唔離譜，執些少無妨，想執得多啲亦唔易，因為交投太疏。360兩年後到期，溢價13.9%，槓桿率3.3倍。
中海油（883）企定喺7.95元，認購輪1759收13.7仙，升0.2仙，5月夠鐘，溢價2.8%，槓桿率5.8倍。中海油呢輪新聞唔少，市場反應算唔錯，股價可以睇高一線，1759吼得過。
同類輪1764，條件其實更靚，但買賣較疏，下月4日最後買賣，現價12.1仙，負溢價0.9%，槓桿率6.6倍。