新車速報：
我來自英國　本田CivicTypeR

歷年成飆車一族寵兒嘅本田CivicTypeR，呢一代卻有重大變革；除生產線移至英國，香港入口數量有限外，中控台嘅手波鋪排，予人有全新觀感及操控之餘，帶有RVFeel味道嘅賣相，亦可謂剛中帶點輕柔及時代美。然而，全新2.0公升i-VTEC偈，響同廠IntegraTypeR有高度評價後，今趟擺放於CivicTypeR身上更見剛猛無匹，令人留有深刻印象㖭。

記者、攝影：陳偉林

辣車不忘　有時尚感
為迎合歐洲市場嘅口味，新一代CivicTypeR，除移師至本田英國分廠生產外，新車嘅造型更脫除原有嘅東洋味，響辣車本色中帶出一分時尚美，剛柔並蓄嘅風格，又豈止單純係跑車咁簡單呢！

中控台手波　操作暢順
一如同廠嘅IntegraTypeR型號，新款CivicTypeR亦以鮮紅車廂色調，配襯深黑用色；對比鮮明下，更能烘托出一雙Recaro桶椅嘅獨特性，而置身其中嘅穩妥同充足嘅承托力，更令人留有深刻印象。然而，車迷所注視嘅會係嶄新嘅中控台手波編排，查實呢種設計，早前響歐洲車款中經已出現，若然駕駛者熟習後，轉檔操控會來得更就手敏捷㗎！

穩紮車架　操控穩妥
新款CivicTypeR同樣用上早前IntegraTypeR，一台2.0公升i-VTEC新偈，除性能表現出眾之餘，本身出色嘅車重比同低重心設計，更帶出有不錯嘅穩定性；而歐式懸掛組合，加上LSD限滑差速器，以及高效能嘅碟式制動，重有EBD及ABS裝置，更予人有豐富嘅對地抓着力及循迹感呢！

本田CivicTypeR規格 引擎： 1998cc直4DOHC 馬力： 215ps/8000rpm 扭力： 20.6kgm/7000rpm 傳動： 6前速手波，前輪驅動 懸掛： （前）柱式獨立　（後）扭力連桿 制動： （前）透氣碟　（後）碟式（ABS） 輪胎： 205/45R17BridgestonePotenzaRE040 尺碼： 4135×1695×1430mm 軸距： 2570mm 車重： 1210kg 平均耗油： 12.4km/L 新車售價： $269,000 車輛提供： 歐日汽車（26200202）