英隆破產案，牽連愈來愈廣泛，律師行寫就嘅報告透露，喺一九九九年，全體董事會同意暫停《公司倫理守則》（CorporateCodeofEthics），以便英隆嘅高層可以出任兩間公司以外嘅「合夥公司」嘅阿頭。美國人性好打官司，本來啲董事已有心理準備，現在律師行報告一出，啲董事嘅法律責任更大，香港嘅陳啟宗可能有排唔得閒。
間核數師行「安達信」被安隆炒咗之後，亦有大危機。今期《商業週刊》好唔客氣，封面故事就係《會計能否苟存？》，內有一篇文章質詢安達信能否逃過解體命運，又話安達信啲合夥人想轉工都冇人敢聘請。
財務伍睇完篇文之後，對左丁山講：「嚡，咁大間行，搞成咁，真係慘情，若果我公司間核數師係安達信，我都會為求自保，立即換過另外一間，否則第日啲股東會有乜冬瓜豆腐控告我，我孭唔起啫。」
中銀集團籌備上市，邀請五大核數師行標投上市核數工作，安達信有中方紅人方黃吉雯在，本來係熱門分子，但係搞咗一單安隆案出嚟之後，冇人敢投下注碼落安達信度。會計界人士話，安達信係「世界合夥人」（worldwidepartnership），美國出事，如果要賠錢嘅話，香港合夥人亦受影響，愈係資深嘅，愈杰。咁就真係要戥方太唔抵，啲年紀輕，升任合夥人冇耐嘅青年才俊，就更加無辜，值得同情。