昨晚東華在尖沙嘴洲際酒店舉行慈善餐舞會，請到行政長官董生主禮，籌到百幾萬服務經費，同場的林煥光和楊永強亦自動彈離阿董身邊避嫌，原本可以圓滿收場，但點知東華第一副主席馬鴻銘於致辭完結時，衰多口講咗句：「預祝董生成功連任第二屆特首，繼續為市民謀求福祉！」
呢兩句一講，八方即刻要幫阿董計吓數──全場筵開三十八席，當約莫一萬元一席，坐底三十八萬，重有小鳳姐同歌星王學琳、中小學同幼稚園學生表演，呢筆選舉開支襟計。因為根據選舉條例，任何為促使某候選人當選而舉行的活動就叫「選舉聚會」，要計算入選舉開支內。
八方即刻問選舉事務處發言人，佢話如果同時有候選人同選民在場，若有第三者發表令人聯想到選舉的言論，都有可能令活動帶有助選性質，要計算選舉經費，不過就唔評論這次事件，只會呼籲有關人士避嫌。
其實廉署亦出過小冊子，教候選人遇上這類無妄之災，只要即時彈起身澄清與自己無關，停止一切活動就冇事。
不過，八方見阿董真係冇乜危機意識，笑吟吟聽完馬主席的祝賀，冇任何澄清表示，重上台同另一位周主席一齊代表東華接受三張共值千三萬的支票。
昨晚冠蓋雲集，阿董同大會都肯定冇辦法知道有冇選委在內，看來阿董競選辦今次難逃失職之嫌，冇事先同大會單聲咪講選舉，亦冇教定阿董點反應。
（圖）東華第一副主席馬鴻銘（右）致辭時一句「祝董生成功連任」，隨時害得阿董唔見幾十萬選舉經費。
E-mail：