電腦產品日新月異，要預測未來IT走勢可謂殊不簡單。HP喺2000年COMDEX曾經展示過旗下嘅ConceptPC，今年再接再厲推出到第二代，不過就移師香港，向傳媒展示呢部集合多個創新概念嘅新機種。由於係概念產品，所以推出日期及售價都未有，以暫時資料所得，呢部ConceptPC大概市值五千美元（約港幣40,000元），不過估計到正式大量投產時，造價一定會平好多！
記者、攝影：徐影龍 ImageGirl：小惠
HP呢部第二代ConceptPC最突出係外形設計，第一眼望落去，已經俾個特大18"LCD吸引住，就算同時運行多個程式，都唔怕互相遮蓋住，用起上嚟零舍舒服，尤其適合圖像工作，或財經界等商業用途。
機身旁邊亦係精妙之處，頂上設有一個視像鏡頭，能作多角度調校，隔鄰則為單聲道喇叭，可即時使用如《Netmeeting》之類嘅視像會議軟件，不過咪就需要另外備置。中間則擺放光碟機，目前暫定為CD-RW，到推出時可能會因應市場需要而換入DVD-RW。而最下方便是藍芽組件，為各式支援周邊作橋樑。
機箱設計四四方方，以銀色為主，雖然相比下較為低調，不過體積着實好Slim，由於光碟機抽起放喺芒度，所以理論上主機箱可放喺桌下較隱蔽嘅地方，呢點值得一讚。
機內採用IntelP4頂級處理器、RAMBUS記憶體和48GB小型硬碟等硬件，至於顯示卡及音效卡則未有定案。由於機箱小巧，散熱問題變得非常重要。第二代ConceptPC採用Agilent開發嘅ArctiCooler散熱器技術，令機內熱氣得以順利排走，可確保系統運作的穩定性。全套ConceptPC只屬概念機種，故此並無推出日期及售價，據HP商業桌面電腦部亞太區市務經理GerhardSchiele表示，ConceptPC作價大概為五千美元（約港幣40,000），相信到真正投產時成本將會大大降低。
顯示屏內置藍芽組件，可支援各式藍芽周邊產品（例如打印機、掃描器、鍵盤、滑鼠及PDA等），全部都可以擺脫接駁線嘅煩惱，雖然記者會內未有示範各類產品接駁情形，不過其鍵盤同光學滑鼠已經屬藍芽產品，由Logitec負責生產，外形充滿CyberFeel，完全襯番晒第二代ConceptPC。
藍芽是一種無線傳輸技術，任何電子設備只要配置有藍芽晶片，就可以在5至10米範圍內，進行無線資料傳送，從而免除了駁線的煩腦，例如現時市面已有手機專用的藍芽Hands-Free，相信藍芽技術未來亦會在電腦普及起來。
好多生產商都會久唔久展示一堆概念產品，目的除咗顯示該公司技術上嘅實力，亦包含洞悉市場嘅能力。不過由於概念產品喺設計上只需顧及外形同實用程度等要素，而開發成本及可行性反而其次，故此大多數設計都較為天馬行空。而HP則較實際，第一代ConceptPC於2000年COMDEX中展示，一年後就發展出相應嘅e-pc系列推出市面。今次發表第二代ConceptPC，從外形到配件，都並非無中生有，主要都係提升電腦使用嘅方便程度，唯一疑問係18"LCD到一年後會否降價至普及水平，讀者不妨放長雙眼去睇。
電話：25997070