美股經濟數據向好，但前晚美股仍然先升後跌，納指更大跌2.5%，搞到中移動（941）及聯通（762）再散過，拖累恒指一度低見10689，但投資者憧憬格老噚晚有好嘢講，恒指跌幅收窄至35點，收10762。
自去年911事件後，股價表現最突出嘅藍籌係邊隻？唔講你可能唔知，竟然係國泰航空（293）。由去年9月17日低位5.90元至噚日收市價10.90元計，總共升咗84.7%。油價回落相信係支持股價向好嘅最主要原因，如果閣下咁好彩低位買咗，未跌穿10元都唔使計數住。
不過趙飛雲暫時就唔會掂國泰，因為佢累積升幅太大，反而鍾意隻中航興業（1110），隻股持有43.3%港龍，港龍2001年業務表現不俗，未來業務前景亦看好，近期有大行點名叫買，估計可帶動中航興業，股價近兩個多月喺1.20元附近有強大支持，可伺機收集。
另外，趙飛雲噚日喺0.30元買入10萬股深圳國際（152）博反彈，如果升破50日線0.325元可加注，但跌穿0.28元須先止蝕。