雖然同樣係賣手提電話，第一電訊（8110）同耀科國際（143）噚日嘅表現就大為迥異。
經紀陳話耀科近排一直受謠言所困，雖然公司已經高調否認有高層喺國內受查，但謠言都係陰霾不散，股價噚日急跌21%，喺38.5仙停牌。市場傳話外邊有位大戶沽貨，但究竟係自願定係非自願就唔知，睇怕復牌都係……。
至於第一電訊點解咁醒神？經紀陳話同公司打算上主板有關。小初起初反駁，話浩倫（1073）一樣由創業板轉去主板，但股價一日低過一日，轉板炒作嘅理由好似牽強啲。經紀陳解釋，由於兩者幕後搞手有別，目標唔同，唔可以一概而論。
另外，媒體世紀（8160）今日掛牌，公開發售部分只得兩成認購，因此入飛嘅都中晒，令人擔憂隻股今日表現。不過，靚仔經紀話，如果國際認購部分芬佬肯坐貨唔沽，公開發售嗰部分貨好易接晒啫。