失驚無神，大市插咗落去，恒指唔見兩嚿，收10797，唔使講，啲藍籌認購輪梗係跌到一仆一碌。跌輪榜是日冠亞季，分別係和黃輪1765、滙豐輪1735同中移動輪1715，呢3件輪，最終變廢紙嘅機會極大。
呢3件末日輪，都係下個月到期，溢價唔低，下周新輪登場，數據拍埋贏成條街，佢哋唔易再搵人要，溢價會縮得更快。
單以數據論，佢哋亦好難出生天，尤其係1715，行使價34.2元，正股（941）現價只係22.6元，望正股喺下月尾之前升5成2，你話機會有幾大？即使望到，現價買隻輪亦只係打和。
姑勿論後市點走，如果想玩藍籌認購證，都係等下周新輪出籠至諗，因為除咗幾件石油輪外，現有嘅藍籌認購證件件都貴。
和黃（013）昨挫2%，帶動隻認沽輪1769彈升逾11%。1769下月底到期，雖然時日無多，但數據唔錯，現價1.54元，輕微低水（負溢價）0.07%，槓桿率4.7倍。睇淡正股揸呢件，應該唔會睇中都要輸錢。