港股噚日靠地產股造好，重上萬一關，齊頭收11000點。美股噚晚假期冇市，有空隙畀大戶將恒指執番靚啲。
美股喺杜指及納指先後跌破50日線後，噚日有言論話市場之前曲解格老對市場嘅看法，佢實際上唔係咁悲觀，格老於本周四出席參議院預算案委員會作證時，會澄清佢嘅觀點，重話月尾多數唔會減息。姑勿論你諗佢係出口術救市，抑或市場真係誤解格老嘅意思都好，始終都會對股市帶來短期刺激。
噚日多間大行籌發新輪，都係以滙豐（005）為主，由於滙豐近期負面消息多，所以發行商傾向好淡輪齊發。此外，和黃（013）亦係首批發新輪名單之一。和黃噚日升1.25元，收74.50元。唔好睇少呢1.25元，佢令到和黃技術走勢改觀，可能會吸引技術買盤博反彈，短期如果升破75元，有機會試一試79元。
趙飛雲噚日喺0.64元買咗10萬股太平協和（438），買嘅原因先前已講過，不再覆述。今次再度上車，因為覺得佢整固將完成，快將有動作，短炒則跌穿0.61元止蝕。