聖誕與元旦期間，沒有出埠也沒安排活動，所以得閒就喺街行嚟行去，觀看人潮成為假期的重點節目。
今年留港的人特別喜歡選擇在街上過節，蘭桂坊與尖沙嘴一帶擠得水洩不通。除夕夜跑到了蘭桂坊，見大批警察嚴陣以待，指揮人群以單方向潮水式進入蘭桂坊。當晚如想進入蘭桂坊，需要兜一個好大的圈，屈指一算，就算排隊入到蘭桂坊，相信都經已過咗倒數時刻九年，所以乾脆與友人站在街上睇吓人。
這群節日警察的制服非常醒目，明顯全部精心洗熨過，尤其係一啲套上白色袖嘅，對白袖潔白如雪，望落就覺得呢隊紀律部隊好有紀律。最怕見到紀律部隊嘅制服着到鬼五馬六，當堂冇晒尊重，詳情最好返深圳行一轉便有分曉。
由於要沿途指揮人群的行走路線，部分警員配備「大聲公」，每隔一陣子便廣播路線指引。蘭桂坊有好多洋人幫襯，所以警員們要以麗音廣播，講完中文講英文，全部講live，並非預先錄音，但發音並不失禮，講live講得好過好多新人上台唱live。
每逢大時大節便會加倍尊重警察，在普世歡騰的日子，個個諗住去邊度玩，警察就要企喺街做嘢兼食西北風，所以好多時都會同佢哋講番聲「聖誕快樂」或「新年快樂」，雖然係好簡單嘅一句，但都希望可以令佢哋覺得有啲回報。至於喺尖沙嘴發生嘅不快樂「新年快樂」事件，誰是誰非都好，希望以後都唔好再發生。