新輪一聲放行，大行紛紛籌發。好得很，新輪條件比以前合理好多。以前一啲輪，半年期，溢價兩三成，槓桿率3倍幾，發行商着晒數。𠵱家各行爭生意，條件寧願輸蝕少少，益吓股民。
例如某行籌發滙豐輪，7個月期，Call輪溢價6%，槓桿率9.1倍；Put輪溢價9.8%，槓桿率9.2倍。又例如長實Call輪，半年期，溢價7.4%，槓桿率8.1倍；Put輪溢價8.7%，槓桿率7.5倍。
類似咁嘅條件，先至係路，啲輪先至有得炒，只要睇中方向，買Call輪後正股升，買Put輪後正股跌，則必然有利潤落袋。唔似得𠵱家咁，正股上升，Call輪可能都要跌，或正股下跌而Put輪仍然冇得升。
有啲新輪今個月28日掛牌，窩輪市場熱鬧氣氛必然再現，唔會再係一潭死水。
台灣阿扁有動作，台股大漲5%，摩台認購輪2270做咗輪王，收2.8仙，升40%。2270上落如過山車，炒嘅話要快手快腳，坐盤千祈咪坐得太耐。3月初到期，坐到尾嘅話，香晒嘅機會大過唔香嘅機會好多。