老夫老妻搞離婚，當然只有一個目的，就係老妻要分身家。唔通唔講心咩？唔講面子咩？唔講幾十年同居、同瞓一張牀嘅感情咩？老人家以前講三從四德，嫁雞隨雞，皆因老公係長期飯票，所以忍得就忍，老夫在外搞三搞四，生埋仔女，只要狐狸精冇得入宮，就可以隻眼開隻眼閉，過埋一世就算。
𠵱家有乜唔同呢？當然有啦。（一）老夫有名有利之後，會成為狗仔隊追蹤對象，老夫與狐狸精相片，隨時上壹仔封面，老妻成為被親友取笑對象；（二）以前男人大晒，現在女權當道，有法律援助，有平機會撐腰，重使乜驚咗老夫；（三）飯票咯喎，容易到極，一離婚就可以分咗老夫一半身家，等老夫肉痛到死，唔知幾爽，咪等佢得番一半家產去開二廠、三廠囉，自己以後就一定生活無憂，有咗十億八億銀，私人銀行家一定會撲埋嚟，爭住同自己管理錢財，自己輕鬆晒，讀書又得，搵朋友陪下慰寂寥又得，夠晒快活。
所以話，啲老夫唔好睇唔起黃面婆、糟糠，亂咁學胡雪巖呀，更何況一啲老夫學咗日本上一代男人嘅大男人作風，兩句唔埋就打老婆一巴，更加容易觸動老妻分身家嘅決心。夫婦離婚分身家呢條案例，對有錢佬家庭嘅影響極為深遠。以前左丁山見過一位名人離婚，俾老婆嘅律師壓迫到要向法庭填報十年收入支出，幾經辛苦先至甩身，嗰鋪困窘法睇見都怕怕。