邱淑貞丈夫沈嘉偉去年中取得日本high-street品牌Zucca代理權，一系列螢光Tee、中文字Tee賣個滿堂紅。原來其中「祝君早安」Tee上的字樣，早已註冊，有關設計及字眼涉嫌侵權，沈嘉偉或會惹上官非。
邱淑貞丈夫、I.T老闆沈嘉偉近年在時裝界大展拳腳，除自創品牌外，更取得不少歐日時裝品牌代理權，去年中由時裝大店Joyce手中搶走日本高級街頭時裝品牌Zucca代理權，一系列螢光、潑墨Tee等大受歡迎，其中印上經典白毛巾「祝君早安」字眼的Tee更賣個滿堂紅，許志安、張智霖等均曾穿着演出。
原來「GoodMorning安早君祝」商標，早於一九八六年已在香港註冊，商標所屬的中國中發公司，前日於報章刊登一段聲明啟事，指公司早已取得商標註冊號（0250of1986），呼籲各方商家及人士切勿再侵權，否則會採取法律行動，以制裁任何非法侵犯或干擾中國中發公司的商標權益。
中國中發公司發言人沈先生昨日在電話中說：「公司發現市面好多人盜用我哋個商標，所以刊登聲明，以正視聽。」Zucca的文字Tee是否盜用商標？沈先生說：「佢哋只係其中一個，重有好多用嚟印牀單、印賀卡，乜都有。我哋有晒商標權，十幾年前已經有晒註冊號碼，你哋用之前查一查就搵到，唔可以話賣得就猛印。」
會否控告I.T？沈先生說：「我唔方便回覆，總之有律師跟進緊，做緊嘢！」沈先生亦拒絕透露公司因商標疑被盜用引起的損失。
I.T市場部王小姐回覆說：「我哋了解過，佢哋嘅商標註冊係屬於第二十四類，即係紡織品之類，時裝、tee應該屬於第二十五類，根本唔同類別，我哋應該冇乜問題。」會停售該批Tee嗎？王小姐說：「嗰批係上一季嘅衫，大部分都賣晒，每季我哋都入唔同貨，應該唔會再入。」
而I.T方老闆沈嘉偉的無線電話則轉到留言信箱，截稿前仍未回覆。
近年不少時裝品牌皆模仿其他牌子的logo（即嘜頭），將之大玩特玩。例如日本品牌BeamsBoys於九九年就推出仿LV經典Monogram的手袋系列，將「LV」字樣改為「BB」。年前本地牌子b+ab亦引入Burberry的經典格仔logo，套用在服飾之上。