三屍倫常慘案令原本已經疏離的一對親家變成冤家。昨晨男女兩家人在紅磡殮房相遇，女戶主的弟弟忍不住衝上前大罵男死者的胞兄：「你哋葉家點解生出個咁無人性嘅仔？」結果罵戰蔓延至惠陽市淡水鎮的鄉下，男死者葉吉粦的兄弟亦不示弱，對來訪記者力數阿嫂每月八千蚊家用重話唔夠，又指她曾拿錢往「大檔」搏殺，惹來閒話。
他認為，把好好一個家弄至如此收場，阿嫂亦要負多少責任。
涉嫌親手殺害一對親生兒女後吊頸的男戶主葉吉粦，他在鄉下的幼弟葉偉民慨歎：「搞單咁嘅六國大封相，說到尾都係自己阿哥唔啱，自己死就好啦！點解要害埋無辜仔女？今次阿哥真係遺臭萬年，連累屋企人都無臉做人，不過有件事亦要澄清。」
他說：「阿哥一九七○年偷渡去香港，最初做五金，後來學啤膠，響橫崗做師傅攞一萬五千蚊人工，最後剩到錢用三十三萬起咗間屋，租出去二千幾蚊租重係阿嫂袋埋，話阿哥同工廠女工發生感情，我哋無話可說，但屈佢包二奶就唔公平，況且阿哥響橫崗工作時，阿嫂響淡水一樣俾人傳亂搞男女關係！」
男死者兄長葉水安表示：「我哋兩家人鄉下間屋相距不足七分鐘路程，『阿雲』（女戶主）以前響深圳羅湖雅園賓館做服務員，係女方家姊做媒介紹兩人相識，後來他們兩夫婦不和，搞到兩家人亦形同陌路。今年三月阿媽過身，葉吉粦帶埋三個仔女返鄉下奔喪，一見佢滿頭白髮嘅憔悴樣，已嚇我一跳，問佢係唔係好唔掂，佢又唔出聲，守夜一晚即帶同仔女返香港。」
女戶主鄉下七十四歲母親姚老太聽到孫兒遇害不禁老淚縱橫，她指葉吉粦這名女婿暴戾、鍾意打老婆，過往女兒回家鄉都見身上青一塊瘀一塊，她的兄弟看不過眼而要經常向葉理論。
本報記者