三菱LancerEvo.V制動器問題

讀者Henry問：本人最近購入咗一部二手三菱LancerEvo.V作座駕，發現制動系統喺激烈駕駛時有過熱嘅情況出現，但此車經已用上原裝三菱嘅Brembo制動系統，就連保時捷都用佢，咁點解我部三菱LancerEvo.V，會有咁嘅過熱情況出現呢？

Henry： 其實大部分日製嘅高性能跑車，所講嘅用上Brembo產品，都只係換上Brembo煞車卡鉗，而煞車皮同煞車碟始終係自家開發嘅產品；而你所講嘅保時捷Brembo制動系統，則百分百係由Brembo同保時捷共同設計嘅。而煞車碟就係制動系統散熱嘅重要零件，其製造原料同設計都與制動效能有直接嘅關係㗎。
若果你要提升LancerEvo.V嘅制動能力，其實係要換上煞車碟同煞車皮，因為佢雖然係用上Brembo制動系統，但其煞車皮只係用上自家開發嘅產品，而唔係用Brembo指定嘅產品，故此其制動能力或未能令你感到滿意。另外，你所指保時捷嘅制動系統，耐力同制動力表現驚人，主要係因為佢有一個巨大嘅煞車真空鼓；故此，其制動表現較為優勝亦不足為奇。

如果大家對汽車有任何問題，可傳真或郵寄俾我哋，我哋會盡快為你解答。
傳真：27420542
郵寄：香港將軍澳工業村西駿盈街八號《蘋果日報》副刊「車天車地」版「汽車Q&A」收