經紀陳噚日神神秘秘咁打電話畀小初，叫小初留意吓噚日停牌嘅冠華國際（539），佢話今日復牌唔排除會有炒作，皆因有銀両到位咁講。
小初收尾睇網站新聞，知道冠華停牌係同北京清華科技園發展中心簽訂投資意向書，以現金800萬元人民幣購入清華科技園旗下張家界清華科技園綠色藥業25%股權，投資發展生產藥用「葛根素」。
小初唔明呢單新聞有幾重要，於是打電話問經紀陳，佢話，冠華由舊年至今，一共做過兩次配股，最近一次配股價27.5仙，對上一次就係25仙。兩次加埋大概集資2000多萬元，但就唔覺有貨散出街。
冠華一向都冇咩成交，但上個星期起，靜靜雞由40仙升上50仙樓上，不過成交好少，似係大幅炒上嘅先兆。
此外隻股嘅炒家，據講已經唔係以前炒開永義國際（1218）嗰班人，照計唔會有供股陰影，可以炒得安心啲。