香港各電台同電視台嘅樂壇頒獎禮，都啱啱派完「成績表」，據班賣碟老闆話，每年喺呢個時候，啲音樂DVD或者得獎歌手嘅演唱會光碟都會特別好銷。當中陳奕迅喺四個傳媒頒獎禮中獲得了15個獎項，成為「傳媒大獎」得主之一，據信和賣碟嘅老闆表示，前晚啱啱見街嘅《THEEASYRIDE陳奕迅演唱會》CD版，未出街前一個禮拜已經頻頻有人問佢幾時返，相信必成近期音樂碟嘅新貴。
記者、攝影：馮彥彰
陳奕迅（Eason）隻《THEEASYRIDE陳奕迅演唱會》前晚先至啱啱見街。雖然係CD版，不過據信和班賣碟大佬話，呢隻碟出貨前一個禮拜，已經頻頻有人問佢幾時到貨，所以相信必成近期最搶手音樂碟之一。
基本上，跟CD會有好多演唱會嘅精采相片，裏面收藏咗Eason大量新形象，想重溫演唱會當時情況，Fans們絕對必買，全個演唱會一共唱咗23首歌，絕對能表現Eason獨有嘅「唱唔斷氣」嘅唱功，整體嚟講，都可算聲、畫俱佳。不過最大遺憾係隻碟欠咗Encore部分，希望遲啲出VCD同DVD版時會追加番。
碟名：THEEASYRIDE陳奕迅演唱會
售價：$85
媒體：CD
近日再翻出嘅《QUEENWEWILLROCKYOU》，絕對係近期勁正DVD，大家唔好理FreddieMercury因愛滋病死得有幾快，但睇番佢着住對adidasCountry出場，由着住衫唱《WewillRockYou》開始，然後一路唱一路除，直到最後剩番條底唱《GodSaveTheQUEEN》，就算唔係現場睇，都一樣可以令你極度投入，最緊要係佢會話畀你知，Rock原來可以係咁樣嘅！
據了解，QUEEN呢隻碟嘅Master係經過重做，而且重加入dts、THX等音效，如果屋企套音響勁嘅話，相信可以聽到隻碟嘅超低頻效果，絕對係對QUEEN歌曲嘅完美演繹，另外，隻DVD入面重有一個專用試機Track，相信係近期最發燒DVD。
碟名：QUEENWEWILLROCKYOU
售價：$230
媒體：DVD（dts、THX）
做完新一代位元堂養陰丸廣告主角嘅李克勤，雖然都唔見得佢嘅人氣度馬上急升，但係佢隻《港樂．克勤》，就憑歌喉同實力，成為近期碟場最好賣音樂DVD。據知因為今次反應咁好，李克勤可能會喺今年二月再追加演唱會，克勤嘅Fans就一定要昅實啦！
今次呢隻《港樂．克勤》，除咗收錄咗克勤好多正歌之外，筆者最欣賞佢用自己風格重新演繹其他歌手嘅「紅歌」，再加上香港管弦樂團嘅和奏，真係好鬼正！而當中嗰隻《K歌之王》，有人話佢唱得重好過原版，不過耳聽為實，大家聽過之後再下判語啦！呢隻碟近排好搶手，信和一帶已經冇乜貨，如果見到就要有買趁手啦！
碟名：港樂．克勤
售價：$185/$85
媒體：DVD（dts版）、VCD
見到周街廣告都知，BEEGEES又有新碟出啦！今次隻《BEEGEESLIVEBYREQUEST》，就收錄咗佢哋早前喺美國所開嘅一個「即場點唱」演唱會嘅片段，當時嘅觀眾可以透過打電話、E-mail或即場投票嚟點歌，所以每首歌都可以話係Fans們心水正歌，當中包括有《Massachusetts》、《SacredTrust》、《HowDeepIsYourLove》等名曲，全部60、70年代味道出晒嚟。
碟名：BEEGEESLIVEBYREQUEST
售價：$230
媒體：DVD（dts）