陳奕迅與劉德華前晚瓜分了「四台聯頒傳媒大獎」，足證Eason過去一年在樂壇成績斐然，不過相對地，有關Eason的是非也是十分多姿多采。而Eason的率性，令他對感情方面亦同樣火爆、執着，但結婚對象，卻始終如一鎖定徐濠縈。
奕迅（Eason）與女友徐濠縈相戀五年，兩口子同樣擁有剛烈的性情，在剛開始發展感情的頭三個月，二人幾乎天天在吵架，五年感情生活亦曾經因此出現過危機。
「我咁大個仔，只係有過三、四個女友，而徐濠縈相信會係我嘅結婚對象。喺我哋拍拖嘅初期，我對佢係完全冇保留嘅，但佢就相反，連佢屋企都唔肯畀我去，問佢點解，佢又解釋唔到。有次我嬲得滯，走咗去佢嘅屋企門口，發晒狂咁搖佢大門嘅鐵閘，後尾佢冇我辦法，先話畀我聽，因為佢屋企細，所以唔想我嚟佢屋企，當時我話『唓！原來就係咁無聊嘅原因，早知唔使嘥我咁多力氣啦！』
「徐濠縈好鍾意乜嘢都擺喺心，但呢幾年對住我都算乜都肯講，我哋拍拖頭三個月日日嗌交，可能因為大家性格都係咁火爆啦！佢同我拍拖頭一個月已經話想結婚，當時我只得二十二歲，始終覺得結婚言之過早。相處咗一年，因為發生咗一啲事，我同佢重分埋手，後尾又走番埋一齊，當時我諗，分開咗重可以喺番埋一齊，呢個一定係我嘅終身伴侶。」
Eason坦承與徐濠縈相處五年，感情已十分穩定，所以彼此之間亦曾正式談過結婚的問題，但甚麼時候結婚，Eason卻堅持要保持神秘感。
「有啲嘢講晒出嚟就冇驚喜，可能聽日就同佢結婚都話唔埋，我好想畀啲浪漫佢，雖然我工作忙，但一啲特別日子，我都想畀啲驚喜佢。好似有年佢生日（三月七日），我專登話要去台灣做嘢，唔可以同佢過，搞到佢失望咗幾日，到六號嗰晚，我重專登去朋友屋企瞓，到凌晨十二點先喺佢眼前出現，搞到佢好感動。」