上個禮拜韋衡有個做「芬」嘅朋友，跟埋班「芬佬」飛番國內，睇中建數碼（1169）母公司海爾喺青島嘅工業園，雖然海爾係國內家電名牌，但朋友本來只係一心想同班行家打個招呼同傾吓偈，諗住國內睇廠都係睇啲生產線點有規模，同埋聽吓班管理層點巴閉法，全無新意，不過去到嗰陣時，發覺完全唔係想像中咁簡單。
佢哋帶住成班「芬佬」去睇手機生產線之餘，重去埋佢哋嘅物流中心，睇完海爾嘅物流中心，班「芬佬」都有一個共識，就係「正」字，話邊個攞到呢套系統，肯定大有前途，皆因成個物流中心完全係電腦化同自動化，海爾重繼續揼錢落去發展其他配套。
如果用佢哋套系統同香港現時稱為最「先進」嘅物流系統比較，香港嗰套只可以叫做「咕哩」系統，可以話完全無得比，睇嚟真係想喺香港搞物流中心嗰班大帝都應該要返國內取經。
事有湊巧，班芬佬返嚟香港之後第二日，隻中建數碼就急急腳再批咗成3.68億股出街，不過今次批股就惹嚟唔小風波，主要係因為單批股同上次批股個價差成毫子，搞到好多人唔滿意，重有人話成單deal係一項不道德交易，不過韋衡就覺得成件事似乎只係吃不到的葡萄。
睇番去年底單批股，其實大家都已經知道會有第二次批股嚟緊啦，因為當日新股嗰部分已經由包銷商啃晒，然後再喺今次批番出街啫，加埋包銷商今次要啃咁大嚿批股，要冒相當嘅風險，點可以話係不道德呢。
今次好彩個價升咗，如果隻股個價𠵱家重係三毫樓下嘅話，你估重會唔會有咁多人出聲呀。