六十八歲老翁（依香港編輯標準，半百老翁時有所聞）拉利京（LarryKing）與CNN續約四年，總酬勞共五千六百萬美元，平均每年一千四百萬美元，而基本年薪就係七百萬美元，其他嗰啲係認股權、花紅等等。呢個身價，同一啲NBA球星差唔多。淨係計基本年薪，已經等於周薪九萬三千五百鎊，貴過晒所有嘅曼聯球星。
咁貴薪酬，是否物有所值，要CNN先至清楚。據講拉利京個清談節目收視率係一點五，觀眾一百二十六萬九千，平均每位觀眾值十一美元（以總薪酬計），電視台靠觀眾嚟收廣告費，大概CNN呢個王牌節目收到唔少廣告費，譬如每位觀眾值四十美元（靠估而已），拉利京收番十一蚊，唔算多吖。
香港廣告市場細美國好多，清談節目主持人嘅報酬自然冇得比，但呢個只係規模問題，道理應該一樣，電台王牌節目主持人嘅報酬應該係最高嘅一個，就算經濟不景，廣告下跌（如今日CNN面對嘅環境），王牌主持人嘅報酬仍然不跌反升，美國人最明白市場道理，所以拉利京、KatieComic等人可以得到咁高嘅報酬。諗諗吓，香港啲老闆唔多識計數，平均最高收聽率嘅鄭經翰節目，竟然要「為大局着想」共度時艱而減薪，你話幾咁冇道理呢！用番拉利京條粗略公式，鄭大班如果每個聽眾收十蚊港紙，一年都應該收三百萬港銀以上，有多冇少。