總結陳奕迅今年在各大頒獎禮所取得的獎項，Eason可說是大贏家，前途無可限量。但Eason的個人言論，卻經常引起非議，諸如較早前他發表不買三大天王唱片的言論，便掀起頗大的風波，更有人指他唱功有餘，內涵不足，一朝得志，語無倫次。
對此，Eason平靜地說：「我唔係話要幫自己辯白，但我當日所講嘅嘢的確被曲解，我真係冇心去傷害任何人，當日我係話有日喺屋執CD櫃，發現黎明同劉德華嘅CD一樣係有咁多隻，張學友就係我一直好鍾意嘅歌手，所以一路都有買佢啲碟，而近年嚟覺得華仔同黎明出嘅唱片，吸引唔到我再買，就算連張學友嘅碟都買少咗，反而學友會送碟畀我，其實呢啲係好個人嘅喜好，唔係代表我唔尊重佢哋。
「不過檢討番呢件事，我終於明白自己係藝人，可能一言一行會影響到某啲人嘅購買慾，一啲無心傷害人嘅說話，原來傷害咗人都唔知，喺呢方面，我會盡量改善吓，以後講嘢會小心。不過我性格一向好率直，可能做完一排驚弓之鳥後，我講嘢都會一樣咁真。」
而Eason坦率、火爆的性格，近年亦經常令他在公開場合與傳媒發生摩擦。前晚他出席港台「十大中文金曲頒獎禮」慶功宴時，又出現一個活生生例子。
當他接受華娛電視台訪問時，有人見Eason忽然撼頭埋牆，然後又表示要走入廁所冷靜，事後有記者問他為何撼頭埋牆，Eason竟反問：「撼頭埋牆動作好激咩？」
但昨日Eason所屬唱片公司負責人Lisa來電澄清說：「噚晚Eason喺記者會做咗好耐訪問，想轉個身透吓氣，點知轉身就係一幅牆，咁啲人就話佢撼頭埋牆，佢喺廁所出嚟，啲記者係咁問佢點解咁做，有時做乜都俾人亂講，感覺係好難受。」
Eason亦坦承自己EQ不夠高，但他認為某小撮傳媒的工作態度亦有改善必要。
「早排喺新城勁爆嘅頒獎禮記者會，其實我係好嬲，好想發脾氣，當日有天王唔睬我，當時我只係覺得無奈，並冇為此唔開心。但令到我好嬲嘅事，係大會司儀喺台上講緊嘢，台下好多人好唔尊重個場合，自己喺度傾偈，又有記者走嚟叫我寫揮春，究竟大家可唔可以尊重吓個場合？」
不少人指Eason臭口，經常開罪人，但Eason在訪問當日，卻告訴筆者他在英國留學期間，每日刷五次牙。問他為何要這樣做時，Eason笑說：「因為冇乜嘢做，得閒得滯，咁咪起身刷一次，食完早餐又一次，食完午飯再一次，到晚餐一次，上牀前咪再刷一次囉！」
回香港後，Eason的習慣雖然改變了，但仍然維持早、晚各一次，看來Eason對個人的口腔衞生十分注重，應該不會臭口吧！
撰文：陳月媚 協力：戴彩煥、羅慧敏 攝影：陳志嵐、何國豪