麥家琪飼養的大唐狗前晚在西貢咬傷一名村民的右小腿，傷者報警並向記者投訴麥家琪外出放狗時沒有替狗戴口罩。麥家琪則回應其唐狗只得四十磅，不需要戴口罩，並謂當時已即時向傷者道歉。
二十六歲的九三年落選港姐麥家琪，前晚在西貢官坑村寓所附近放狗，其中一條大唐狗咬傷一名二十九歲姓曾的男村民右邊小腿，最後傷者報警處理。傷者事後向記者投訴，指麥家琪放狗時，沒有拖實狗隻，亦沒有替牠們戴上口罩，並指咬人的大唐狗曾有噬人的紀錄，因此村民經過時均提心吊膽。
昨日記者致電麥家琪，她直認其唐狗前晚確實有咬傷人，她說：「我噚晚放狗嗰陣，因條狗繩甩咗，佢就即刻撲埋去咬傷咗人，我即時同傷者講對唔住，跟住話畀佢聽我隻狗已打咗針，問佢傷得嚴唔嚴重，使唔使同佢去睇醫生，佢重同我講話冇乜嘢，俾狗咬到好小事啫。」
傷者事後報警，麥家琪認為是受人唆擺，她說：「大概半個鐘後有差人到場，當時我行緊返屋企，知道後咪去落口供囉。我懷疑係另一個村民教佢報警，因為嗰個人養咗十幾隻狗，但又好唔鍾意其他人養嘅狗。」
麥家琪住了西貢年多，去年四月曾被本報記者拍得和一名男公關同居，兩人回家時，麥家琪更在寓所門外與三條唐狗嬉戲。麥家琪昨日稱自己只養了一條狗，其他兩條是流浪狗。麥家琪說：「件事好複雜，我隻狗本來都係流浪狗，另外兩隻一隻係佢阿媽，一隻係佢兄弟。本來我都想收養晒佢哋，不過另外兩隻唔肯跟我返屋企。而我養緊嗰隻之前俾漁農署捉咗，所以我就去漁農署收養佢。我出去放狗，通常都會餵埋另外兩隻，我隻狗以前冇咬過人，咬人嘅狗係其他村民養嘅。而且我隻狗得四十磅，唔需要戴口罩出街。」
麥家琪表示狗咬人有許多原因，她說：「狗係冇性嘅，我唔會特登叫佢去咬人啩！有啲人見到流浪狗，用石頭擲佢哋，又用高爾夫球棍打佢哋，有時狗咬人都有原因㗎。」
採訪、攝影：杜建彬、張止寒
根據漁農自然護理署的「危險狗隻規例」，格鬥狗（即比特鬥牛、阿根廷杜告狗、巴西非拉狗及日本土佐犬以及這類品種的任何混種狗）須於公眾地方以長度不超過一點五米的狗帶牽引，並戴上識別頸圈及口罩。
以往曾在沒有任何被激怒的情況下，而向人畜攻擊的狗隻，亦須在公眾地方戴上口罩，並受嚴厲管制。而大型狗隻（即體重超過二十公斤，約四十四磅）雖然未規定必須佩戴口罩，但須以長度不超過兩米的狗帶牽引。
資料來源：漁農自然護理署網頁