早前假珠海賽車場舉行嘅「Dunlop2002超級戰車終極戰」中，除有一批超級跑車及賽車女郎現身珠海賽道外，當日更上演咗多場精采嘅跑車追逐戰，可謂十分精采刺激。不過相信最吸引嘅，就係場內一部由JUN改裝嘅富士Impreza22B戰車喇。
據講呢部Impreza22B戰車，係車主特地寄往日本JUN作大幅度改裝；話雖如此，但此車嘅外表無乜大變動，皆因JUN並無為其加裝誇張嘅包圍及擾流裝置，而只係改換上17吋超輕胎軨及高性能輪胎而已。
而車廂布局則面目全非，除換上Stack嘅多功能顯示表板外，又設有大量賽車化按鈕，兼且更加設有防滾架及Prodrive桶形座椅，一派高性能跑車之感表露無遺。另外，JUN亦可謂係車壇中嘅改車高手，就連電腦亦係根據引擎嘅改動而設定，所以你喺車廂內係唔會見到有任何燃油比調較嘅設備；就連波箱亦已換上直齒式波牙，排擋座亦被升高，慢車入波時會聽到「卡卡」聲，由於Racing離合器嘅行程非常短，所以每次轉波時都要將離合器完全踏下才可。而引擎嘅輸出亦見強勁，大概約為350匹以上，真係你都咪話唔厲害㗎。