林海峰前日朝早攞錯黃秋生首《男人40無得撈》嘅粗口版本嚟播，馮仁昭噚日一早起身聽收音機，阿Jan個節目《好世界》一開波就有個控制員宣布，因為阿Jan播錯粗口歌，所以商台高層決定暫停佢所有職務，不過佢人工照出，花紅都照出。
馮仁昭心諗乜真係咁大劑？點知隨即就聽到阿Jan話：「我就想喇！」然後播番《男》嘅潔淨版，原來係阿Jan幽自己一默啫。
播完歌之後，阿Jan話前日有記者狂Call佢，佢個心就好驚，喺度諗：「死喇，聽日實上頭條呀！」佢話今朝買報紙睇，真係上咗頭條，不過好彩寫嘅都係事實，所以佢要公開多謝採訪嘅記者喎。
不過噚日有記者去商台想問番阿Jan呢件事，究竟點會咁唔小心，佢就叫商台公關同記者講，佢唔想接受訪問，冇嘢要回應喎。
蔡少芬因為同吳奇隆聚少離多，以致俾人傳佢哋已經分手，不過，馮仁昭個老友早排喺金鐘西武百貨嘅foodcourt食嘢，竟然撞見佢哋兩個喺度食嘢，原來蔡少芬好嚮往普通人拍拖嘅生活，兩個人去食快餐都食得好開心，至於佢哋分手嘅傳聞，亦都證明係流料。
梅艷芳呢排頻頻蒲吧，但佢嘅蒲點就轉咗去跑馬地BrsiWine&CocktailBar，淨係喺上個禮拜，阿梅就去足三晚，聽講阿梅係鍾意嗰間Bar夠靜又夠暗，傾偈時會冇咁多人留意，而且佢重次次都坐二樓嘅卡位，可以望埋樓下有冇記者。
鄭中基嘅老竇鄭東漢，𠵱家重係環球唱片亞太區主席，不過佢應該做到三月份就正式請辭，而鄭東漢嘅職位就由一位叫HenryHui嘅高層接任，好多人都揣測鄭東漢辭職後，總裁陳少寶都會相繼離巢，但馮仁昭知道陳少寶喺短期之內唔會辭職，因為佢好鍾意喺環球做嘢嘅氣氛，同班同事又合作愉快，所以少寶重同啲員工講笑話：「拉我都唔走㗎啦！」
吳雨自從入主英皇，取替李進嘅行政總裁一職後，吳雨喺上任嘅呢兩個月，行事作風相當低調。馮仁昭聽聞吳雨幾勤力，日日都返公司開會，跟足公司運作同進度，而佢更加同啲員工嚴正聲明，唔准佢哋再咁多口，亂咁講嘢，以免俾人覺得英皇歌手太多是非，其實吳雨咁做都啱嘅，公司少啲是非梗係好啲啦。