冬天食羊肉有助促進血液循環，增溫保暖功效，喺冬天嘅日子，成日好易手凍腳凍嘅朋友，食羊肉就最適合不過。羊分為好多部位，其食法亦可以有好多變化，就等小記介紹四款粵菜中較為少見嘅食法供大家參考，燜煮、煎、炸、煲湯，梗有一款啱大家呢！
記者：陳冰麗 攝影：關文慧、陳冰麗
羊仔扒肉嫩汁甜，喺西菜中較常見，中式食法較少。羊仔扒通常係取自綿羊多，肉質會稍為羶咗啲，可以配番個酸甜汁一齊食。
菜式設計：桃源酒家行政總廚葉永雄
地址：尖沙嘴廣東道33號中港城一樓
電話：27361688
材料
羊仔扒6件約1磅4安士 洋葱絲両半 粟粉1湯匙 薑米、蒜茸各1茶匙
汁料
OK甜酸汁1湯匙 茄汁2湯匙 喼汁1湯匙 紫蘇葉2片
黑椒碎半茶匙 糖2湯匙 蠔油半湯匙 鹽少許
做法
1.羊仔扒解凍後，拍上少許粟粉，下油鑊煎至兩面至七成熟。
2.炒香洋葱、薑米、蒜茸。
3.加入汁料煮滾，將羊扒回鑊煮至收汁即成。
賣相十足十燜豬腳，羊髀肉肉質稍為嚡啲，但食落又相當有咬感，而且鮮味十足，所以一齊燜煮嘅配料薯仔、洋葱、甘笋係精華所在，必要食埋。
材料
羊髀肉1隻約1斤
薯仔1個
洋葱、甘笋各半隻
白菌2両
咖喱油11/2湯匙
淡奶2湯匙
蒜茸包6件
做法
1.羊髀肉洗刷淨，出水備用，起油鑊將羊髀肉炸透。
2.薯仔、洋葱、甘笋及白菌各切件後走油，餘油爆香咖喱油。
3.將羊髀肉加入同燜約兩小時至腍，加入淡奶拌勻即可以，配以蒜茸包蘸汁進食。
脆乳豬食得多，呢款脆羊腩係創新食法，先將羊腩配以滷水香料燜腍再炸脆，既香又脆，蘸甜醬食，重以為食緊乳豬。
材料
羊腩斤半
滷水香料適量
醬汁
甜蒜茸豉油、甜醬各適量
做法
1.羊腩放爐上燒去幼毛、洗刷淨，出水備用。
2.煲滾適量水，放入滷水香料煮至出味，然後放入羊腩煲約3小時至腍，隔起解凍備用。
3.燒熱油鑊，放入羊腩炸脆，切件上碟可蘸醬汁食。
用羊蹄煲湯鮮甜而又不肥膩，配以有辟腥味嘅生薑，更加唔覺煲湯腥，喺寒冬下飲呢個湯全身都會暖笠笠。
材料
羊蹄4隻
羊骨1斤
豬𦟌12両
火腿少許
淮山3両
杞子8錢
紅棗8粒
生曬圓肉1両
陳皮1角
生薑4片
做法
1.燒去羊蹄幼毛，洗刮淨，連同洗淨嘅羊骨、豬𦟌及火腿一同出水備用。
2.淮山、杞子、生曬圓肉沖洗淨備用。紅棗去核，陳皮刮去瓤，洗淨。
3.煲滾適量水，放入各料以大火煲滾，再改用中火煲約3小時，加鹽調味便可。
羊仔扒
羊仔扒大多數係來路貨，以澳洲及新西蘭進口貨居多。呢部分近羊鞍位，因為活動量少，肉質較為鬆軟，適宜煎、燒、焗食法，可配以濃味醬汁或芥辣等一齊食。
$24-$26/100克
city'super有售
羊腩
羊腩即羊嘅肚腩位，同樣因為呢部分活動量唔大，所以肉質都唔會太韌，不過呢部分皮位多，可以燜煮過後食或炸，肉質軟腍適中。
$38-$40斤
各大肉枱有售
羊蹄
羊蹄係羊之中比較少人食用嘅部分，所以多數只有新鮮肉枱至搵到，而且要買嘅話最好預先叫檔主留起。羊蹄食用嘅部分好少，用以煲湯多，羊蹄唔太肥膩，加上佢膠質豐富，煲湯飲實有以形補形，補腳骨功效。
$26-$28/斤
各大肉枱有售
羊髀肉
羊蹄對上就係羊髀肉，分有骨及無骨，新鮮及急凍兩種，街市搵到嘅多為新鮮貨，大陸進口且有骨，而大型西式超市如city'super則有來自新西蘭嘅急凍有骨及無骨羊髀肉，分別售$12-$13/100克。羊髀肉肉質纖維會較粗，所以較適宜燜煮，怕羊羶味，可以咖喱煮之，香濃而又惹味。
$36-$40斤
各大肉枱有售
羊肉營養價值
羊肉含豐富蛋白質、礦物質和維他命B，其營養價值相當高。羊味甘，性溫。
有益氣補虛、溫中暖下功效，同時有治虛、治產後或病後虛冷等症。
小貼士
1.羊有羶味，加薑一齊煮係幾好嘅辟羶方法。
2.女士血虛體弱，可加當歸煲湯飲，男士飲則可以加黃芪煲。
3.以羊肉作食療嘅話，則不宜連皮用，因皮膠質重，難消化，病後更不宜食用。