港股噚日喺11000水平徘徊，未有跟住美股升，有人話係因為滙豐（005）被調查非法將資金調離阿根廷，可能會令滙豐受壓。傳聞話所涉及嘅金額非常龐大，如果真係咁，可能係好消息至啱，市場𠵱家估緊滙豐要為阿根廷撇帳約100億港元，如果撇帳可以大幅減少，重唔係好消息？滙豐噚日收88元，升0.50元。恒指則收10972，跌40點。
媒體世紀（8160）以下限2.60元定價，招股數量亦由2.7億股減至1.7億股。黑客話主要因為認購反應平平，可能係資金對呢類股份興趣已減，加上現時市場已有唔少實力更強嘅媒體股，所以好難圍飛。據聞另一隻戶外媒體股媒體伯樂（8072）反應都係一般，所以短期要小心埋白馬（100）、路訊通（888）與tom.com（8001）。
地鐵（066）財務總監郭敬文話，如果政府將沙田至中環過海鐵路批畀九鐵，政府就要向地鐵投資者解釋，又話會損害國際投資者對港府信心云云……，終於惹來吳榮奎還擊指其冇根據。
其實阿虎都曾經講過類似嘅說話，阿虎作為地鐵1000股嘅股東，當然贊成佢咁講法。不過，出自郭生把口就似乎唔係好正常，因為政府從來冇承諾過話要將經營權批畀地鐵，郭生咁講法係咪一廂情願，抑或另有內情呢？一向冷靜嘅郭生都如此敢言，唔通反映政府心意已決？地鐵股價後市可能有麻煩。